2022年11月29日 星期二

$+博物館

其實一個人(一家人?)要幾經常去公幹(旅行?)先可以儲到好似戶主咁多「戰利品」呢(00:00 - 08:50)?

樓盤傳真 19/11/2022 第四節 2022年11月20日

設計廊:室內設計要顧及戶主一系列的收藏品,例如佛像、古董等,配搭古典線條,再加上低調的襯托顏色,成為現代中式風格。

有錢便是任性,戶主仔大女大,便叫切雞C推砌一輪,美其名「現代中式」...唔係「現代」,唔通係「古代」,唔打燈復古點爉燭油燈咩?

戶主兩公婆住1,500呎三房套,廳大房大唔使左偷位右偷位都夠住。而且戶主夫婦都應該係有家底的大忙人,既有傳統中式傢俬,又周身癮去各國鳩嗚,所以就要切雞C將所有嘢擺哂出嚟哂命:

客廳最搶眼的就是實木餐枱(左上、右上),廳兩邊都係展示櫃擺滿各類擺設,有佛像有千手觀音有神仙有水昌有模型仲有個鐘(左中、右中、左下、右下),好似去咗夜冷舖咁,也不怕滿天神佛唔吉利(見伸延閱讀):

老派梳化伴隨酸枝椅子(?)、茶几、及掛畫(左上),前方係靚靚大電視與音響組合(右上),轉角又展示櫃放滿模型與相機,證明男戶主有品味又識嘆,當然更不缺錢。而切雞C就襯機解析吓中式傢俬顏色大多深沉,所以就用白色櫃對比(左下、右下)...不過魔術師較為關注的是展示櫃的 backlight 燒咗要換都幾麻煩:

切雞C將書房改成多用途房,趟門設計加所謂「滿洲窗」增加採光度(左上、右上)。多用途房除咗有電腦周書架做書房用途,仲有大型展示櫃擺滿模型車;更爆的是多用途房有木人樁、八斬刀、雙截棍可供火麒麟周身癮的男戶主練武(左中)。男戶主可能是武職出身,不怕兵器不吉(見伸延閱讀),仲將在兵器架對面加設雙人床,可供「兒女」返嚟採望時留宿(「兒女」訓埋一張床?),拉埋簾便可覺覺豬...不過兵器架易見血光,訓落床要小心唔好有「太大動作」,否則震得幾吓書櫃上的書好易跌落嚟扑穿頭:

切雞C將宅內兩間尾房打通成特大主人房(左上、右上),又改吓門位等打造出小走廊一邊的衣帽間和梳妝枱(左中、右中)。主人套廁門口改在小走廊內,內有防滑地磚以防戶主跌倒(戶主咁多興趣仲以為佢未係廢老),但日式浸缸咁深,跨出來都有一定危險,咁又唔怕跌倒咩(左下、右下)?

切雞C將廚房改成半開放式,近廳設有吧枱,再以「正苦健康院」式的長虹玻璃趟門分隔(見《偽持續發展屋》),以防油煙弄污戶主的收藏品(左上、右上)。廚房盡頭是洗衣房、工人後門、及放大型雜物的雙面櫃(左中、右中)。雙面櫃的另一邊為工人姐姐所用:姐姐訓碌架床上層,下層擺私人物品,另有小小的次所(沖完涼睇怕有怕抹),居住環境尚算可以(左下、右下),總好過肥豬切雞C俾12呎棺材房上下格俾兩個工人姐姐訓仲話「工人姐姐訓得舒服」(見《人均百呎擠迫戶》)。畢竟戶主咁多擺設,工人姐姐抹塵都抹到PK,抹完又要記得放返原位擺靚靚,心驚驚怕打爛嘢,唔對佢好啲都唔得也。

精華版如下:

***

伸延閱讀:

百度百科:滿州窗

偽持續發展屋

人均百呎擠迫戶

(圖片來源:《建築師妙手旺宅》蔣匡文編著 萬里書店出版 2013年7月第一次印刷) 

9 則留言:

  1. //唔通係「古代」,唔打燈復古點爉燭油燈咩
    古代可以玩大紅燈籠高高掛添XD反正女戶主有類似唱大戲嘅衫,可以cosplay一吓。

    //有佛像有千手觀音有神仙有水昌有模型仲有個鐘(左中、右中、左下、右下),好似去咗夜冷舖咁
    展示櫃應該用古董最好喺中式嘅襯返,用呢啲現代嘅,做得好嘅勉強可以話似博物館,差嘅就真喺似夜冷舖。擺亦都應該要精,位置亦要諗過唔好成堆成片牆咁擺晒出嚟,唔好將啲無關嘅例如模型又擺出嚟。真喺咁多可以輪流擺有新鮮感,又唔怕積塵。

    //用途房有木人樁、八斬刀、雙截棍可供火麒麟周身癮的男戶主練武
    咁多東西點練武呢?唔怕一野掃哂啲嘢落地?

    //兵器架易見血光
    仲有咁多車衝埋嚟咁,點瞓呢

    //但日式浸缸咁深,跨出來都有一定危險
    戶主人老心不老,睡房電視架最右邊中格有日式春宮圖 (Shunga) 一冊(其實仲有本中國性史圖,魔兄竟然冇cap呢個XD),睇完要去日式浸缸實踐一吓。

    呢嗰切雞雖然唔知點解就要接近兩球,但喺睇在對工人姐姐都算OK,嗰戶主起碼書房都有啲(有味)書,算喺咁啦。

    回覆刪除
    回覆
    1. //古代可以玩大紅燈籠高高掛添XD
      //睡房電視架最右邊中格有日式春宮圖 (Shunga) 一冊(其實仲有本中國性史圖
      //但喺睇在對工人姐姐都算OK,嗰戶主起碼書房都有啲(有味)書

      我睇完再睇都搵唔到!不過戶主書房有好多練氣功、長生不老等嘅書,男戶主應該成日要採陰補陽。

      //真喺咁多可以輪流擺有新鮮感,又唔怕積塵。

      要 book 個迷你倉叫工人姐姐搬來搬去了。

      //唔怕一野掃哂啲嘢落地?

      雙截棍周八斬刀呢吓勁!

      刪除
    2. //我睇完再睇都搵唔到!
      精華(!)版最後幾秒有影住嗰書架

      //雙截棍周八斬刀呢吓勁!
      唔知喺老實商人嗰種定喺前popo,不過咁多神佛好似冇關公

      刪除
    3. //精華(!)版最後幾秒有影住嗰書架

      係喎!哈哈!

      //唔知喺老實商人嗰種定喺前popo

      似係老實商人嗰種多啲,popo 好難成日周遊列國。

      刪除
  2. 有錢勁
    第2樣野係佢唔怕上TV,我諗我他日如果發左,我都唔想上TV
    嘩佢仲要有2個工人姐姐,其實有乜野做呀,都係家務同煮飯姐? 可能佢要姐姐幫佢洗模型車
    我自己都有野鍾意,但就唔想好似佢咁儲collection,唔通我係因為無財力?? 我自己又覺得d 野擁有左又點,死果日又唔知點處理

    回覆刪除
    回覆
    1. //嘩佢仲要有2個工人姐姐

      應該係得一個工人;兩個工人嘅 case 係之前篇文

      人均百呎擠迫戶
      https://magicianyang.blogspot.com/2016/06/blog-post_27.html

      //我自己又覺得d 野擁有左又點,死果日又唔知點處理

      叫親戚燒俾自己 XD

      刪除
    2. //死果日又唔知點處理
      死咗就好自然地唔使再理喇XD

      刪除
    3. //死果日又唔知點處理

      https://www.lcsd.gov.hk/CE/Museum/History/zh_TW/web/mh/about-us/assessment.html

      真有價值的,有博物館收的呢。

      刪除
    4. //死咗就好自然地唔使再理喇XD

      阿貓姐擔心埋在世的人... 真係「死咗都唔放過」啲身材外物。 XD

      //真有價值的

      相信大部份傷民「收藏」的只能算是心頭好玩具而已。

      刪除