2012年11月15日 星期四

逆工管思維(十二)之職場騙案

魔術師自問EQ已經「高咗好多」,幫廠仔執手尾執咗成個禮拜,係今日先忍唔住同廠仔爆一鑊。當然就係俾廠仔惡人先告狀,話魔術師態度唔好喇!

是咁的:事緣美顏上司叫第三世界廠女S電郵一份文件俾佢,廠女S剛巧放假,便叫「聯絡人(coordinator)」廠仔R處理:「R,請幫忙。」

而廠仔R竟然就左手交右手寫封電郵俾魔術師:「魔術師,請處理。」

 

本來救火已經救到哂煙,一眼見到真係火都嚟埋,於是回郵:「你地可唔可以唔好將個問題環繞地球一周之後毫無增值(without any value added)咁俾返香港處理呢?美顏上司就係知廠女S係原作者先問佢啊!」

不是嗎?如果魔術師有呢份文件的話,美顏早就問咗魔術師喇,使鬼問你咩?

第三世界的廠仔就係咁無常識,想也不想就像電話接線咁,按「1」字就搵魔術師。

「聯絡人」呢個職位,應該係「廢人」的同義詞。

更爆的是,「聯絡人」廠仔R同廠長S都話魔術師態度惡劣,要留意用字,好歹廠女S都係一個副經理咁話,仲提供咗一個唔合乎公司保安制度的方法俾魔術師:「你可以咁樣做架嘛!」

當然仲要「施屍」埋俾美顏同頭領N。

同人嘈喇喎,咁美顏梗係話魔術師唔啱喇。

個問題就係,太著重和諧,係會將問題掩蓋的。廠仔爆鑊爆到總部哇哇叫,要總部女頭領N同香港男頭領N決定唔再俾班廠仔做,仲特意指派魔術師去幫班廠仔補鑊,竟然換來一句「你小心講嘢」、「態度惡劣」、同「要尊重佢地」之評。

咁邊個尊重魔術師呢?

魔術師本來唔多服氣,之但係忽3靈光一閃,於是話好喇,同佢地道個歉喇!

咁做好似好聽美顏話咁,識得認下低威,但其實其設個局,睇下美顏識唔識做。

即係好似《恐懼鬥室》中的陷阱一樣,用來測試一下「獵物」的反應。

數小時後,美顏看來無乜反應。

魔術師亦心知肚明,火起上來,電聯美顏,講返頭先件事,最後話:「佢地咁叻咁重要咁要呵護,無腦做錯嘢搞到一鑊粥就大哂,我話下佢地就錯哂,咁你炒我囉!」

自稱「呢個部門大把人叻過魔術師」的美顏「竟然」無言可對,爆鑊要幫手的時候,啲「叻人」唔知去哂邊。

另一個問題來自魔術師自轉組以來從未「正名」,個職銜依然係跟緊妹頭時的樣子,所謂名不正言不順,出師無名,班廠仔唔知魔術師乜頭乜路,梗係俾班廠仔恰。

於是魔術師趁呢個機會逼美顏寫返封信,講明魔術師的職級,其實係高過嗰個所謂「副經理」的廠女S好多,而且做嘅嘢係由兩位頭領特地指派的,「唔好當魔術師流嘅」。

由美顏的反應,唔多唔少都更確認了跟前同事A的共識:1. 呢個部門係當我地班轉組嚟嘅人只係僱傭兵,做完呢個大茶飯project,用完就會掉,唔會同你諗長遠,所以連職位都費事同你搞;2. 廠仔無論幾鑊都好,始終都係「自己人」,魔術師呢類臨時指派的「專員」,當然唔會同班廠仔講仔細喇!

所以呢,都係早走早著!

當然前同事A就更加早著先鞭,提早退休回家享(湊)仔福囉!

2012/11/15 01:09:11 

10 則留言:

  1. I am always right.. (ROFL)

    回覆刪除
  2. 哈,見到你出咗啖氣,我都覺得好gur。
    "太著重和諧,係會將問題掩蓋的。"正正喺依家啲公司嘅寫照。不過今次你出到啖氣除咗有理之外,都要"爆鑊要幫手的時候,啲「叻人」唔知去哂邊",否則只要有一個半個喺度你都可能會捉蟲。

    回覆刪除
  3. 直程去推我去送死喇! 搞唔掂班廠仔,就係我無能;搞得掂班廠仔,最多咪俾句well done我囉,反正都係外援之馬.

    回覆刪除
  4. 好耐無見呀易亦!
    「叻人」有好多種,社會上最能生存嘅,就係「吹水叻」嘅人;之但係去到救火場面,靠嘅係真功夫,「叻人」就唔係口中所講咁多嘞.
    所以電車部點cut人都好,「真高手」係唔會俾人cut嘅,因為一有起鑊上來,就係要靠呢班高手了.只不過絕大部份公司都係「有事鍾無艷,無事夏迎春」,和平時代做好似賴係唔使靠呢班高手咁吊高來賣,結果有起事來就隨時揩大鑊.

    回覆刪除
  5. QUOTE
    不敗的魔術師 : 好耐無見呀易亦!「叻人」有好多種,社會上最能生存嘅,就係「吹水叻」嘅人;之但係去到救火場面,靠嘅係真功夫,「叻人」就唔係口中所講咁多嘞.所以電車部點cut人都好,「真高手」係唔會俾人cut嘅,因為一有起鑊上來,就係要靠呢班高手了.只不過絕大部份公司都係「有事鍾無艷,無事夏迎春」,和平時代做好似賴係唔使靠呢班高手咁吊高來賣,結...UNQUOTE
    咦,估唔到大名鼎鼎嘅魔術師竟然記得我 :P咁都要你老細慧眼識英雄先得嘅,否則撞著啲發鷄盲嘅昏君就未等到養兵千日就已經俾人攞咗去祭旗,好似岳爺爺咁飲恨收場。當然,以魔術師呢啲人材當然唔會好似岳爺爺咁戇居坐以待斃喇。

    回覆刪除
  6. 辦公室的人事,只要你唔志在,抽離點看就很簡單。肯定不能太委屈啦。

    回覆刪除
  7. 炒我仲好,即時有退休金攞架我地!

    回覆刪除
  8. 以前計過,1000萬流動資產加一層供完嘅樓,應該可以靠投資收入提供捉供足夠唔太豪的生活費,到時做又得唔做又得,心境就會輕鬆好多.

    回覆刪除
  9. QUOTE
    不敗的魔術師 :
    以前計過,1000萬流動資產加一層供完嘅樓,應該可以靠投資收入提供捉供足夠唔太豪的生活費,到時做又得唔做又得,心境就會輕鬆好多.
    UNQUOTE




    呢條數我都計過,不過一條友又唔係真係退休,打風流工,其實唔駛咁多。

    回覆刪除
  10. 係呀,打風流工(我將之定義為「初級財務自由」)其實唔多的.以個人為單位,大概400-500萬流動資產加一層已供滿的自住樓其實已經足夠.

    回覆刪除