2017年10月8日 星期日

最後的出前一丁

「你阿媽有心臟病,係佢嘅問題;Call 你,係公司嘅事;我地就係要做好自己份內事!」
1997年,公司開始做千年蟲測試。在測試期間,魔術師在半夜經常收到不少非緊急 call。當年魔術師一家住公屋,睡碌架床,不斷的奪命追魂 call 自不免嚇親阿媽。為了減少無謂 call 的次數,魔術師企圖跟當時的上司理論,結果換來上述的回應。
於是,魔術師索性把心一橫,跟老父商量,以公屋換居屋,到時魔術師自然可以有一間房,甚至可以裝獨立電話線。
1999年,居屋入伙。
2001年,老媽過世。
2006年,老父過世
魔術師後來依然企圖夜晚放工買菜回家做飯,但畢竟工作繁重,只維持了約一年便沒法繼續。
自2007年起,在周末或放假等不用上班的日子,魔術師開始懶到將早餐合併午餐,就在樓下的小店吃。
試過了數間不同的店子,終於找到這一間最對魔術師口味的。

尤其是出前一丁麵餐,煮完之後麵質適中,唔會太稔又唔會太生,很有點像老父煮麵的感覺。
後來發現的鹵水雞翼,同樣係汁都撈埋。

可能唔係太健康,但就真係好味。
至於其他例如豬軟骨飯,咖哩牛腩飯等,都是「遠近馳名」。
一間其貌不揚、只有十來個座位、餐牌也也沒有甚麼花巧的小店,假日裡街坊竟然可以攞飛排隊等位等上半句鐘,外賣更是做到停唔到手,送到去10多20分鐘步程遠的消防救護站也是常見。食品質素之高,不說自明。
2014年,魔術師搬離了這居屋屋苑,但每逢假日,與及「被分手」及裸辭的日子,魔術師都不介意坐上一程車,就是為了過來吃麵。
可能重臨這屋苑,是為了找回父母的感覺。
看着小店的員工,有新來的,也有離去的,但其「家庭氣氛」,始終融洽不變。
天時熱,老闆娘又會請員工吃西瓜,魔術師都曾沾上邊吃了一片。
魔術師跟餐廳仝人雖然亙不知道對方名字,作為「熟客」,卻有一種不算是關係密切,但卻又有點默契的朋友關係。
但近年屋苑多了文柒代言的連鎖快餐店進駐,目測人流的確是是輕微少了。
因為,作為小店,街坊生意,最緊要的,當然就是價錢平;在百物騰貴的今天,其價格加幅根本就追不上通漲。
得知小店竟然就在魔術師生日那天結業,實在是晴天霹靂。

今天,就去吃最後的一個出前一丁。
並送上一枝紅酒,以賀老闆娘榮休之喜。

小店員工阿姐話10月18日會開返,又睇下啲味道會唔會保持水準?
***
伸延閱讀:
一本大書(2nd Edition)

63 則留言:

  1. 大家都係住屯門, 唔知有冇見過面

    回覆刪除
    回覆
    1. 都有可能架. 我周末最鍾意就係出市中心行.

      刪除
  2. 而家每朝都塔960X 過海返工, 都好小機會係屯門食早餐

    回覆刪除
    回覆
    1. 我以前住大興就經常搭960系, 但後來搬咗就極少搭了.

      刪除
  3. 如果舊老闆年紀大無精力打理, 成功賣盤以作退休用同安置好原有顆計, 以小店經營者來說已經是幾好的結局了.
    新老闆上場, 雖說會留用大部分員工, 不過磨合期難免會再有人離開. 這幾年在香港, 小店數目減少得好快, 令人懷緬的地方亦越來越少.

    桑梓

    回覆刪除
    回覆
    1. //舊老闆年紀大無精力打理

      佢又未算老紀大無精力嘅,真係唔知係乜原因。

      //安置好原有顆計, 以小店經營者來說已經是幾好的結局了.

      佢地嘅安排已經係好好。 好多熟客都唔捨得。

      //不過磨合期難免會再有人離開.

      呢個都係正常。要睇下新老闆同舊伙計夾唔夾了。

      //這幾年在香港, 小店數目減少得好快, 令人懷緬的地方亦越來越少.

      所以,我就算搬咗都要返去食,真金白銀日常咁去支持,而唔係到人地要結業時才去打卡扮懷念。

      刪除
    2. 魔術師生日快樂!

      刪除
  4. //「你阿媽有心臟病,係佢嘅問題;Call 你,係公司嘅事;我地就係要做好自己份內事!」

    雖然好無人情味,但呢個都未算最pk的講法,起碼(表面上)佢鐵板一塊一視同仁。我以前有個老細(即系話“你啲friend唔會care你既前途,但公司會”嗰個),我最討厭就系佢會用自己觀點衡量幾時先要俾人情味:例如嗰兩年晚晚十二點個個weekend都要OT一日時,你請假的話,佢會追問你放假的理由,如果一兩日純粹hea或搞啲私務,就算佢批都屌到你拆天;相反你話買晒機票book晒旅行團就一定好順攤咁批。我嗰陣一個住我屋企附近的同事,有次佢明明話放假去旅行既期間點知系街撞到佢,佢都話為咗請假唯有講大話話自己去旅行。

    但問題啲假期系員工的,你做上司既責任理應只能就著公司業務需要決定批定唔批,員工私底下做乜春關你叉事?

    //但近年屋苑多了文柒代言的連鎖快餐店進駐

    52長期真系絕無投資價值,由一件事可見一斑:廣州東站隔離好大嗰個商場(東方寶泰廣場),其中一條行人電梯兩邊賣晒大快活廣告,竟然一直仲用緊文柒個柒head做代言人,上個月仲見其中一個柒head俾人用箱頭筆畫花咗。嗰個位系地鐵站轉火車站必經之地,相信有啲呢度去開廣州的我城讀者都會留意到。

    一間上市公司有咁既市場部同傳信部,未來價值真系好打有限(你乾脆摺晒蝗國啲分店反而無咁嬲)。

    //得知小店竟然就在魔術師生日那天結業,實在是晴天霹靂。
    //成功賣盤以作退休用同安置好原有顆計, 以小店經營者來說已經是幾好的結局了.
    //新老闆上場, 雖說會留用大部分員工, 不過磨合期難免會再有人離開

    從好方面睇,舊老細賣盤仲連員工都轉埋手,其實對所有人都系好歸宿.
    飲食業流失率其實好大,就算平白無事都一樣會來來去去,今次唔會有一次大變就已經算系咁了。

    //這幾年在香港, 小店數目減少得好快

    西區嚟講近年反而茶記越開越多,而大家樂同老麥竟然有幾間霸住同一個舖位超過二十年,連鎖店變另類老店.

    回覆刪除
    回覆
    1. 原來摩兄都係西環人
      西環尾呢邊乜唔係酒吧同Cafe多咩?
      士美菲同石塘咀間M記我出世就已經喺度。

      刪除
    2. //雖然好無人情味,但呢個都未算最pk的講法

      係涼薄咗啲啫...

      //佢會追問你放假的理由,如果一兩日純粹hea或搞啲私務,就算佢批都屌到你拆天;相反你話買晒機票book晒旅行團就一定好順攤咁批

      可能休息佢會覺得無value,但唔去旅行個員工就會死 XD

      //員工私底下做乜春關你叉事?

      前黃C上司都唔鍾意我用名牌嘢喇!

      //一間上市公司有咁既市場部同傳信部,未來價值真系好打有限

      最弊佢股價表現好過大檸樂。

      //今次唔會有一次大變就已經算系咁了。

      同意呀。似乎個阿姐話俾我聽18號會開返時都有啲興奮。佢係半新移民,嚟咗幾年,係口音未正,起碼有份工做有收入對基層來說已經唔錯。

      //西區嚟講近年反而茶記越開越多
      //西環尾呢邊乜唔係酒吧同Cafe多咩?

      以前返僱傭兵公司,係在中環近上環,最遠會行到去上環街市頂層食泰國嘢。 沿路又真係多茶記的。

      刪除
    3. //「你阿媽有心臟病,係佢嘅問題;Call 你,係公司嘅事;我地就係要做好自己份內事!」//
      「你阿媽係女人,我阿爸係男人;我哋係同事!」絕對空廢! XD XD
      同盧海鵬唱「日頭食飯,夜晚食面,才沒有弱點!」(用張國榮隻側面唱)茅分別!

      刪除
    4. 呢位上司嘅意思係公司唔會review政策,減少啲三更半夜嘈醒同事的無謂call,我阿媽更是佢死佢事。

      刪除
    5. 以前小子做某大地產商旗下的ACCOUNTANT 都係咁, 請假俾人X到拆天, 話: 我唔見做會計的會有時間去旅行, 自己卻去歐遊
      此等上左位的老海鮮真的不敢恭維. 只提醒了小子受人二分四係出賣時間及尊嚴以及帶老母番工咁不孝而已

      刪除
    6. //此等上左位的老海鮮真的不敢恭維. 只提醒了小子受人二分四係出賣時間及尊嚴以及帶老母番工咁不孝而已

      係咁捽啲下屬,想博升?抑或揸咗好多公司股,想業績好股價好? But anyway, 人地工餘的人生同埋屋企人,又關做上司的甚麼事?

      刪除
    7. 魔兄:伸入快樂呀!~

      //原來摩兄都係西環人

      系呀! XD

      //西環尾呢邊乜唔係酒吧同Cafe多咩?

      其實都系環繞住泓都附近多,而且除咗幾間大嘢例如Jasper外,拍烏蠅既都唔少,好多開無耐就執,啱啱吉席街有間做ShabuShabu好多日無開,應該摺埋了。

      我又唔覺純粹起幾棟偽豪宅住多幾個expat可以養咁多蘇豪店,始終呢啲高消費食肆齋靠區內人好難開到成行成市,但堅尼地城系尾站唔易太多區外人入嚟消費。

      //士美菲同石塘咀間M記我出世就已經喺度。

      唔認老都唔得...呢兩間我睇住佢開的...

      石塘咀間系88年大約11月開業。

      士美菲間應該系92年初開,因為我好記得當年開咗無耐,復活節學校假期同啲損友打麻雀之後就去呢間M記食嘢,食完就去灣仔睇《逃學威龍2》...

      其實更經典系香港商業中心間大家樂,我88年搬入嚟就已經系度,我都唔知佢開咗幾多年;個肥仔分店經理做咗起碼廿年,我早排去仲見到佢。

      反而大快活一直霸唔到個長期舖位...

      //最遠會行到去上環街市頂層食泰國嘢。 沿路又真係多茶記的。

      上環啲茶記好多都系做OL生意,開到六點就收的,星期六日直情唔開...

      //係咁捽啲下屬,想博升?抑或揸咗好多公司股,想業績好股價好?

      的確有好多老seafood會有“公司即自己”的諗法。

      刪除
    8. 西環我都住過10年。有間「客尚來」巧巧食。每次我都要食口水雞!
      大快活根本唔好食,算吧啦!
      有咗地鐵真好!塞車情況改善咗。
      西環私樓多,狗屎跟著多!

      刪除
    9. //伸入快樂呀!

      謝謝摩摩!

      //拍烏蠅既都唔少,好多開無耐就執

      年青人的唔等使創業夢啊!

      //呢啲高消費食肆齋靠區內人好難開到成行成市,但堅尼地城系尾站唔易太多區外人入嚟消費。

      根本只會幫襯慣性收視,即係LKF。

      //個肥仔分店經理做咗起碼廿年,我早排去仲見到佢。

      飲食業可以做咁耐,又真係奇葩。

      //上環啲茶記好多都系做OL生意,開到六點就收的

      嘻嘻...所以有時行遠啲都好嘅.

      //的確有好多老seafood會有“公司即自己”的諗法。

      唔知大檸樂個肥仔經理有無咁諗呢?

      //有間「客尚來」巧巧食。每次我都要食口水雞!

      將呢間嘢紀錄在案先!

      //西環私樓多,狗屎跟著多!

      住唐樓, 養番狗?

      刪除
    10. //係咁捽啲下屬,想博升?抑或揸咗好多公司股,想業績好股價好? //

      //的確有好多老seafood會有“公司即自己”的諗法。//

      我老豆退休多年都仲勁"公司即自己"
      以我既理解,
      佢係足文革泥香港, 書讀得唔多,只係基層員工
      但係食正經濟起飛年代, 人工升得快
      生活改善得幾明顯
      自然將生活改善既"恩情"記在心裏

      俾我老豆升佐上中層管理既話,
      相信佢都會律己以嚴, 再律人以嚴,
      我覺得都有佢既道理

      只係古代人可以獻身俾工作或者家庭
      現代人則強調"自己"

      係世代隔閡

      刪除
    11. //現代人則強調"自己"

      呢個係西方思想, 以我為先.

      刪除
    12. //自然將生活改善既"恩情"記在心裏
      //俾我老豆升佐上中層管理既話,
      //相信佢都會律己以嚴, 再律人以嚴
      //只係古代人可以獻身俾工作或者家庭

      現代來說,只有倭寇才留有盡忠主公的文化。

      //呢個係西方思想, 以我為先.

      西方思想就係僱傭兵意識。

      刪除
    13. //有咗地鐵真好!塞車情況改善咗。

      地鐵既“功績”就系將本來死咗九成既往來港島東西區既公海小巴線徹底消滅。

      //有間「客尚來」巧巧食

      我感覺「客尚來」系外省新移民開的,因為啲口味唔似傷民甚至廣東人後天學返嚟。

      不過我比較少幫襯,都系鍾意坐茶記...尤其「客尚來」嗰段皇后大道西,真係幾步就一間茶餐廳.

      //呢個係西方思想, 以我為先.

      若果“我”是指提升自己競爭力、省靚自己brand name,咁我的確認為絕對可取過“將公司當做自己”。

      不過而家好多有青的“以我為先”系指公司反過來要圍住自己轉,哪怕自己毫無競爭力對公司毫無貢獻。

      刪除
    14. //地鐵既“功績”就系將本來死咗九成既往來港島東西區既公海小巴線徹底消滅。

      又唔見班有青去保護集體回憶嘅?

      //不過而家好多有青的“以我為先”系指公司反過來要圍住自己轉,哪怕自己毫無競爭力對公司毫無貢獻。

      簡直係要個地球圍住自己轉, 但又唔諗下佢地誰也不代表誰, 點轉法都唔practical.

      刪除
    15. //「客尚來」系外省新移民開//
      潮洲人開的。I like very much! 我中意味濃! XD XD
      狠酒以前,水街果頭有間好似叫「皇后餐廳」,聽聞老闆以前係差人。佢用靚絲細飯!問你服未!個窩蛋免治牛飯 is my favourite!夜晚有 minimum charge,D人去踎,睇波開賭局。過咗沙士到就執咗!其餘所有茶餐廳,唔係污糟到暈,就係油浸,一係難食!咁不如上大學食 7 折飯!飲 7 折 Starbucks!
      曾經開過一間好經典嘅「滄浪亭」。高級打邊爐!好多西半山嘅明星落嚟食!開咗一年多啲就執咗!
      另一間推介「活一鮮」,日本料理。唔扮高檔,但亦唔係 cheap 嘢!
      唔怕鹹,可以走返去水街附近,一間叫 Amy's Kitchen。茶餐廳來講,唔錯。
      又走返去堅尼地城,宏都隔離,近高逸華軒,「西環碼頭」唔平但好食。不過我好耐冇去,唔知佢 keep 唔 keep 到。嗰度嘅位置,一次打風嘅時候試過成地都係魚! XD XD XD 所以嗰度起嘅新樓,好似高逸華軒咁,地下都係起高幾級!

      刪除
    16. 絲苗米變咗絲細飯 XD XD XD
      順便講一講,西環碼頭好似係何鴻燊第x太有份。無人夠膽肉佢。 XD XD XD
      近活一鮮,有間「華星客棧」,個 menu 好似武林秘笈咁,好搞笑!

      刪除
    17. 死火,C嬸你講好多間都見過,但全部無食過! 除咗Amy's Kitchen...我唔敢肯定食過間嘢係咪呢個名...

      //夜晚有 minimum charge,D人去踎,睇波開賭局。過咗沙士到就執咗!

      講開有波睇,都係最懷念99-05年開係荷蘭街同海皮交界既澳門麗都茶餐廳(即係而家Tivo)! 初頭開通宵,後尾縮到三點。當年未禁煙,夜晚一有波睇成班爛賭鬼攤晒波經吞雲吐霧炒蝦擦蟹,好鬼好feel! 本來幾好生意,但突然摺咗...當年係連鎖,好似鄧趙磚有份,我網上搵到僅有資料係06年差評下全線結業,唔知係咪當年掛住溝佢而家幾條女,無心經營嘞.

      而家成個中西區差唔多完全無茶記有波睇的.

      //又唔見班有青去保護集體回憶嘅?

      我的集體回憶係當年中巴服務勁pk,我地來往港島區外唯一靠小巴,結果係任由小巴佬宰割,中意起價就起價等客就等客。城巴新巴上軌道後,港島公海線小巴已經死咗九成,地鐵只係落最後一刀嗻。

      所以我完全唔明白點解中巴結業會有班有青美其名為"藍戰士".

      //好似高逸華軒咁,地下都係起高幾級!

      魔兄話過,呢啲係"界腳水".

      刪除
    18. C 嬸、摩摩:

      你地講啲飲飲食食嘢我完全唔係我嗰瓣,不過又幾有趣,長了知識。

      話說前同事A都住上環,等我又問下佢先。

      //任由小巴佬宰割,中意起價就起價等客就等客。

      如果在雷洛係度,咪可以將啲紅van規範化囉!

      //魔兄話過,呢啲係"界腳水".

      係「割腳水」呀! XD

      刪除
    19. //好似高逸華軒咁,地下都係起高幾級//你地講啲飲飲食食嘢我完全唔係我嗰瓣//
      唔講飲講食,不如講下紅燈區紅牌阿姑(胭脂扣),同鬼怪傳說。 XD XD

      我一般講上環係指信德一帶賣海味,同西環唔一樣。西環由西營盤,石塘咀,到堅尼地城。

      //係「割腳水」
      聽落好靈異咁喎!

      刪除
    20. 校園區唔休做,學生食客要求低,自然多劣食。
      嘩!唔知C嬸所講嘅其餘茶餐廳,包唔包括我學生時代飯堂,第一街康樂茶餐廳呢?
      當年廿二蚊大碟碟頭飯包靚例湯涷飲,仲要係玻璃支裝汽水唔駛加錢。
      日日lunch time都由般含道剷落去食飽飽再爬返上山。
      Form2冬天嗰陣我地仲要膽粗粗午市叫羊腩煲,自此成為放聖誕假前嘅ritual。
      諗返啲羊腩夠淋,枝竹又入曬味,真係回味無窮。

      同班friend reu諗唔到食乜都會去返康樂。
      老闆娘真係睇住我地大,依家去親都仲要收少我地齊頭咁話。

      刪除
    21. //唔講飲講食,不如講下紅燈區紅牌阿姑(胭脂扣),同鬼怪傳說。

      我唔識寫懷舊甜古。

      //當年廿二蚊大碟碟頭飯包靚例湯涷飲,仲要係玻璃支裝汽水唔駛加錢。

      頹飯其實都不太頹,係班有搞奄尖啫。

      //老闆娘真係睇住我地大,依家去親都仲要收少我地齊頭咁話。

      個體戶真係好!

      刪除
  5. 麻甩佬一個人食飯既地方,食慣左真係會有感情。

    回覆刪除
  6. //尤其是出前一丁麵餐,煮完之後麵質適中,唔會太稔又唔會太生,很有點像老父煮麵的感覺。//

    睇相我就覺得個面太生 ^O^

    細時睇味吉陽一就教落: 回憶係最好既調味料- 係爸爸既味道呀!!

    果然無錯

    回覆刪除
    回覆
    1. //睇相我就覺得個面太生 ^O^

      我又覺得爽口適中喎!

      //細時睇味吉陽一就教落: 回憶係最好既調味料- 係爸爸既味道呀!!

      呢樣真係啱到無得講。XD

      刪除
  7. 原來魔術兄以前住富健/龍門居﹗
    果度而家變咗出名既屯門食街,好多舊小店執咗,新小店開張,有啲小店生意好,態度仲好囂張,我最憎賣手抓餅果條MK仔 .\/.

    你之前位上司真係幾涼薄,唔知佢有冇家庭,或有冇仔女同佢送終?

    魔術兄雙親原來咁早過身,我有啲難過 :( 難得搬左大屋
    睇得出魔術兄都係孝子,佢地應該好安慰

    回覆刪除
    回覆
    1. //果度而家變咗出名既屯門食街

      我最鍾意就係「齊齊串」同「泰美」(不過呢檔又係串的)。

      //有啲小店生意好,態度仲好囂張,我最憎賣手抓餅果條MK仔 .\/.

      呢件金毛實係唔得,個格都衰過人。
      又,我同隔離賣腸粉的都幾熟。

      //我有啲難過 :(

      多謝關心。

      //難得搬左大屋
      //睇得出魔術兄都係孝子,佢地應該好安慰

      正常來說,多數人都會做「孤兒」。層居屋本來都係諗住俾兩老養老,嗰時諗就算有對象,港女都要二人世界,所以要預留金錢...

      又,依家我屋企一樣仲有神位供奉老豆老媽。依家班有搞唔係啃老就係要搞革命要老豆老母擔心,這也是我為何咁憎班「一袋年搞人」的原因。

      刪除
    2. //我最鍾意就係「齊齊串」同「泰美」(不過呢檔又係串的)。
      泰美果兩條肥妹係幾串~唔知係咪真泰妹黎LOL

      //呢件金毛實係唔得,個格都衰過人。
      佢直頭會出口串啲客,真係勁仆街,幫襯完一次我發誓唔再幫襯

      //層居屋本來都係諗住俾兩老養老
      //依家我屋企一樣仲有神位供奉老豆老媽。
      依呢越黎越少人識為父母着想了(唔計果啲本身屋企父母唔似人樣果啲可憐人)

      刪除
    3. //原來魔術兄以前住富健/龍門居

      唔記得講: 乜你唔認得水電貓咩? XD

      //泰美果兩條肥妹係幾串~唔知係咪真泰妹黎LOL

      如果係講泰妹, 就係齊齊串, 唔係泰美了.

      //佢直頭會出口串啲客,真係勁仆街

      都唔明點解啲客咁犯賤幫襯佢.

      //依呢越黎越少人識為父母着想了(唔計果啲本身屋企父母唔似人樣果啲可憐人)

      養不教,父之過呀!

      刪除
    4. //唔記得講: 乜你唔認得水電貓咩? XD
      好耐無去果頭啦~ 真係唔認得

      //如果係講泰妹, 就係齊齊串, 唔係泰美了
      你啱!

      //都唔明點解啲客咁犯賤幫襯佢.
      香港人口裡說不,身體卻很誠實

      魔術師富健/龍門居個單位賣咗啦?

      刪除
    5. //魔術師富健/龍門居個單位賣咗啦?

      賣咗喇!我係典型沿著置業階梯向上活。

      點解會換樓?
      http://magician__yang.mysinablog.com/index.php?op=ViewArticle&articleId=4782459

      刪除
  8. 先預祝魔術師哥哥生日快樂! 身體健康,生活如意。

    明天也是小女兒的生日,真巧!希望她長大了也會如魔術師哥哥咁叻叻!

    回覆刪除
    回覆
    1. 謝謝呀!大家咁話!

      我都唔係好叻叻啫,浄係叻過啲港豬之馬! XD

      刪除
    2. 首先生日快樂!

      關於魔術師雙親故事,就諗到呢句老話「樹欲靜而風不息, 子欲養而親不在」~~

      香港哋唔多公司真正掌握 HR。
      如果唔能夠畀到員工一個安心工作嘅環境,邊個會專心一意做嘢呀?
      要免除不必要嘅 call 不但只係令員工開心工作,對公司亦可節省不必要開支。
      上司唔係只有工作上嘅責任,亦需要照顧員工面對嘅問題。不過,呢 D manager 冇乜幾個。
      一句講曬 Happy staff happy customer
      所以D工畀機械人擔任,效率必定更高!

      刪除
    3. //樹欲靜而風不息, 子欲養而親不在

      我故意唔寫出嚟...

      //要免除不必要嘅 call 不但只係令員工開心工作,對公司亦可節省不必要開支。

      但係要免除不必要嘅 call, 就要做上司的出面同其他 team 傾, 以「做好呢份工」的人來說, 要佢地咁挺起胸膛搵嘢傾, 未免太強人所難;更何況如果總舵主怪罪落嚟, 話點解 testing 場有 bug 唔即刻執, 佢咪可以賴隔離team 囉, 佢自己已經責成魔術師唔好理阿媽死活, 漏夜搞掂咗自己嗰part...

      刪除
    4. //責成魔術師唔好理阿媽死活, 漏夜搞掂咗自己嗰part...//
      真係枉佢講得出口。唔攬自己啲靚,做乜鬼嘢大佬!以前有客係電話閙我個靚,我唔使佢聽果個客電話,叫佢直接飛畀我聽!豈有此理!

      刪除
    5. //唔攬自己啲靚,做乜鬼嘢大佬!

      呢個世畀好多唐唐, 無腰骨無膊頭的.

      刪除
    6. 魔兄生日快樂! 事事順景.

      // 樹欲靜而風不息, 子欲養而親不在

      呢句真係好有共鳴. 有時諗返都覺得當年點解唔努力啲搵錢, 令到佢哋可以早啲享受人生. 又或者多啲陪佢哋.

      刪除
    7. 謝謝。

      孝順呢家嘢,真係只能盡力做好自己本分。

      刪除
    8. 自從老媽子走左, 我同老豆講嘢, 唔會好似以前掘雷鎚咁. 以家人大咗, 有咗自己嘅家庭, 深深體會到佢哋當年嘅養育之恩, 真係還唔清. 我以家係好後悔當年無好好對老媽子. 正正應咗句:子欲養而親不在.

      刪除
  9. 祝生日快樂先(又喺雙十節同中華民國同慶啦)!

    小舖老板喺租嘅定喺自己嘅舖?如果餐牌冇變就好,最怕搞啲新潮日式韓式唔三唔四嘅嘢。

    魔術兄雙親原來咁早過身,我有啲難過 X2

    我而家番屋企喺唔睇唔回公司電郵。不過以前真喺好難cut辦公室打電話的,又冇來電顯示之類。

    回覆刪除
    回覆
    1. //祝生日快樂先(又喺雙十節同中華民國同慶啦)!

      謝謝呀!以前真係滿街青天白日旗同我賀生日的!

      //小舖老板喺租嘅定喺自己嘅舖?

      租鋪來的。呢個屋苑啲鋪俾某中小型地產霸買哂

      //如果餐牌冇變就好,最怕搞啲新潮日式韓式唔三唔四嘅嘢。

      我都係咁望。搞 fusion 啲街坊應該接受唔到,實聽執。

      //魔術兄雙親原來咁早過身,我有啲難過 X2

      再謝,有心。其實嗰時我都20到尾至30中了...

      //不過以前真喺好難cut辦公室打電話的,又冇來電顯示之類。

      當時公司係出部專用電話俾我地班電車仔輪住拎的,一人拎一個月;拎親精神壓力極大,好似拎住炸彈咁。

      刪除
  10. 感覺上好耐冇睇過魔兄呢類散文. 我個人是很喜歡的.

    //依家班有搞唔係啃老就係要搞革命要老豆老母擔心,這也是我為何咁憎班「一袋年搞人」的原因。

    我地呢代人做嘢後大多會比錢父母,比我细幾年的朋友有唔少已唔會咁做了,新一袋自己搞得掂自己就已經好好了.

    又,祝魔術師生日快樂! 新工工作愉快.

    回覆刪除
    回覆
    1. //感覺上好耐冇睇過魔兄呢類散文. 我個人是很喜歡的.

      謝謝欣賞。呢類文章要有 mood先寫得好。

      //我地呢代人做嘢後大多會比錢父母,比我细幾年的朋友有唔少已唔會咁做了,新一袋自己搞得掂自己就已經好好了.

      只能夠話縱慣哂依家班有青,連犧牲自己少少養下家都咁艱難。

      //又,祝魔術師生日快樂! 新工工作愉快.

      謝謝!暫時一切順利!

      刪除
  11. 生日快樂呀,魔兄!仲有新工開工大吉!

    回覆刪除
    回覆
    1. 謝謝!工作okay,暫時未係太忙。

      刪除
    2. 畢竟離開兩年,有冇唔慣?

      刪除
    3. 咁又無乜, 係啲IT程序多咗又蠢咗啫.

      刪除
  12. 魔兄這種寫親情的散文很棒很細膩,順祝生日快樂


    回覆刪除