2018年3月15日 星期四

肥仔強勢回歸

這天傍晚七點,就連包青天上司都放工去了,辦公室就只剩下小貓數隻,坐在遠處的靚仔僱傭兵同事 Chi Lam 悶得發慌,便走來跟坐在魔術師對面的男僱傭兵L打牙較(係,魔術師調咗位,seating plan 變成下圖)
Chi Lam 跟 L 愈說愈興奮,正用手提電腦記賬計身家魔術師(係,魔術師係慣性手提電腦隨身帶的)竟然從 Chi Lam 口中聽到久違了的肥仔的名字,心中一凜,便八八卦卦地哄埋去聽。
「喂,阿L,你知唔知肥仔返咗嚟呀?」Chi Lam 有如發現新大陸一樣。
「知!佢去咗乜乜 department 做吖馬!」L 的語氣一如既往的平淡。
「咦?你點知嘅?佢有搵過你呀?」事情很快便轉入直路。
「佢尋日有搵過我,約我食飯...」L 都係好平淡。
「佢尋日搵你呀?佢今日都有搵我喎!」Chi Lam 的反應活像是收到了傳銷電話一樣。
「咁佢有無約你呀?」L 反問。
「有呀!不過我無睬佢。咁你有無睬佢呀?」Chi Lam 的反應活像是收到了傳銷電話一樣。
「我都無呀。點解你會咁問嘅?」
「我驚如果你應承咗佢,而我又唔睬佢,搞到我好似好衰咁。」Chi Lam 的想法頗為奇特。
「點解你唔想同佢食飯嘅?」L 真係又天真又傻。
「哎...佢呢個人...」Chi Lam 欲語還休,始終在公司講舊同事是非唔係咁好,「總之佢呢個人唔知點咁喇!」
魔術師心想:「只要你一應酬式同佢傾上兩句,佢就馬上同你扮哂 friend。嬲佢又唔知,話佢又唔好意思吖馬! 」
可能魔術師邊想邊微笑,Chi Lam 終於發現了魔術師的存在:「魔術師,咁你呢?肥仔有無搵你呀!」
「有...」魔術師話音未落,Chi Lam 已開始追問:「佢幾時搵你呀?」
「前日。」
「吓!原來肥仔同你最 friend!」Chi Lam 大吃一驚,「咁你有無睬佢呀?」
「有...我話咗邊呢個禮拜幾日得閒,點知佢又再問我下個星期,我跟住就無睬佢了。」

可不是嗎,依家係你約人,唔係人約你。你約人之前,好應該計算好日子,話定幾個選擇俾人地聽;如果自己真係太忙,就唔好開聲住了;否則問完人今個星期,然後又問下個星期,你當自己係皇帝乎?
魔術師將這個想法告訴了 Chi Lam,不由 Chi Lam 嘆服:「呢招高喎!」
「呀!唔知肥仔今次係做長工定係做僱傭兵呢?」L 岔開了話題。
「多數都係做僱傭兵喇!乜乜 department 請人都係做物物 project,做完咪散 band 囉!」Chi Lam 都頗熟門路。



到了今天,肥仔又傳來 Whatsapp:

今次到佢想打聽 L 同 Chi Lam 係唔係長工嘞!
男人之家咁八卦做乜?依家呢個件代,長工同僱傭兵有分別咩?公司都係話同你分手就分手架喇!
最難頂的係嗰句「How are you millionaire」...先唔講魔術師之前同佢有講過下買樓同埋投資嘢;就算無講過,以魔術師睇落去個樣都唔係有青年紀,有返個錢好出奇咩?使唔使咁寫法?依家同你好 friend 咩...
不過,肥仔真係以為魔術師入院時「問候」過魔術師(見《「出咗院未呀?」》),就係「friend」了?真係好鬼乞人憎。
魔術師真係好想學田二少咁講:「我同佢唔係好熟...」
***
伸延閱讀:
我們都係僱傭兵
「出咗院未呀?」
田北辰當面否認是老友(蘋果日報 2002年5月17日)

22 則留言:

  1. Hey man
    What's up fatty?

    回覆刪除
  2. 米腸M同洋腸妻喺唔喺夫妻,點解隔咁遠嘅。

    //肥仔強勢回歸
    竟然返到同一間公司,冇問reference?或者唔喺太著緊僱傭兵?

    //Do you have lunch plan this week
    就算對方冇plan都未必想同你fatty食或同任何人食。邊有人一開口就咁問,除非喺女友/老婆就話啫。再追問Next week(點解語氣咁倔)就真喺采佢有味。

    //最難頂的係嗰句「How are you millionaire」
    仲要由下午三點幾whatsapp到七點幾。

    回覆刪除
    回覆
    1. //米腸M同洋腸妻喺唔喺夫妻,點解隔咁遠嘅。

      唔係Li, 洋腸妻是靚媽,米腸M是宅男。

      //竟然返到同一間公司,冇問reference?或者唔喺太著緊僱傭兵?

      可能等人用,同埋可能人事部懶唔想再做 reference check.

      //就算對方冇plan都未必想同你fatty食或同任何人食。邊有人一開口就咁問,除非喺女友/老婆就話啫。再追問Next week(點解語氣咁倔)就真喺采佢有味。

      佢真係以為同我好 friend

      //仲要由下午三點幾whatsapp到七點幾。

      好煩呀佢!

      刪除
    2. //米腸M是宅男
      僞ABC港女蝗女坐得咁遠無得用pat pat打招呼,真慘XD。咦以前有四朵金花坐喺魔兄後面嗰噃。

      刪除
    3. 無辨法喇, 雖然佢地係第二個 team, 但都同肥仔一樣, 12月31日連班女都renew 哂 contract,有人走亦有人留.

      刪除
  3. 無乜self-awareness,返工對住佢一定好難頂

    回覆刪除
    回覆
    1. 呢啲人,想subtle叫佢知難而退,佢又唔醒,有時想俾面佢都好難。

      記得在美顏組時,那些米帝頭頭寫嘢真係好得,例如佢地會話:I don’t want to make you look foolish, but I will if I have to...

      真係無面俾的。

      刪除
    2. "You leave me no choice but to x you!" XD XD

      刪除
  4. 呢家有一百萬其實一個招牌責落來都死好多人
    仲有懶FD個下堅惡頂
    小朋友, 職場同歡場一樣無真心, 係朋友都係離職後先做會好D囉

    回覆刪除
  5. 我想好多人在職場壓力大,有時做些小動作係想調劑一下無咁枯燥吧。公司有工資發,同事才有緣在一起工作。

    回覆刪除
    回覆
    1. 自從佢問我「出院未」之後我都無乜理佢,最多只係公事上搵下佢。包青天無同佢續約之後我都無理佢喇!可能我對人真係太有禮貌了。

      刪除
  6. 睇見個標題都令人覺得沮喪。

    好怕呢D冇自知之明的。

    回覆刪除