完全飛自由

原來同魔術師一樣，飛哥都係生長於木屋區；不過，佢同魔術師唔同嘅係，飛哥會考科科Ｕ。就係因為讀書唔成，先成就了佢成為「資深物業投資者」同埋「劏房大王」，仲攞咗Ｎ個學位同埋專業資格（請參閱其 Facebook），早早財務自由；反之，好似魔術師呢類「學霸」，就要做死一世打風流工的工資奴喇！你地話讀書有乜用呢？來來來，快啲聽吓飛哥嘅教誨喇（７：５３—１２：４５）！

收租回報低企投資者趁高位出貨 2019/04/06 22:20

近月入伙盤放租量大，反映投資者比例高，但收租回報普遍低企，加上新盤均以高價開出，買樓收租門檻高、回報低、限制多，傳統投資者反而趁高位出貨！除非以另類收租方式，或能提高收益及回報，但亦有另類成本及室內規格需兼顧！

示範單位為屯門某大型屋苑最細單位，４１７呎，兩房連大窗台，五門歸心（左上），市值樓價５３０萬，市值租金＄１２,０００，回報率為２.６％。良心業主（是否飛哥買樓班的學員？）將客廳一分為二（房２、房３），又將３５呎的廚房改成房１，加上原來的兩間房４、房５，再改建次所，將浴室與馬桶分開，增加使用效率（右上）。改建成本為１５萬（左中），如果要賣出則要加上還原成本（右中）。其中房３以每月＄３,８００租出，其餘細房叫月租＄３,５００，大房叫月租＄３,５００（左下）。假如全數租出，則每月租金收入大升６５％至＄１９,６００，回報率亦躍升至４.３％（右下），算是多過冠君產業信託（02778.HK）的股息率（見伸延閱讀）：

單位大門用密碼鎖，方便轉換租客（左上）；但其實魔術師覺得用電子門鎖的匙卡會敢好，但成本當然會較高。行入走廊，右手邊就是由客廳間出來的房２（右上），左手邊就是由３５呎廚房改建而成的房１（左中），月租叫價＄３,５００，即是呎租＄１００了。再行前經過浴室和次所（右中），去到單位盡頭就是原來的兩間附送大窗台的房間（房４、房５)，與及由客廳僻出來的、已租出的房３（右下）：

每間房的設備大致相同：床上方是貯物櫃（左上），另外備有能屈能伸電視及雪櫃（右上）、摺疊式飯枱暨工作枱（左下），與及冷氣機及窗（但此劏房單位的窗卻是通向走廁，並無採光效果（右下）：

住得劏房，要求自然唔能夠太高。好似呢間由廚房改建的房間咁，一開門就見到只係得張床，要閂埋門先可以拉起張摺枱，基本上走動空間同張摺枱係共享的；摺枱亦會頂門，如果房內有乜事，出面嘅人要破門入內亦唔係咁易（左上、右上）。大房勝在可以利用埋個窗台放雪櫃，留返多啲地面空間（左中）。業主亦非常貼心，在狹窄的走廊加個微波爐，令空間更狹窄，以免住客中央肥胖，走起火警上來身法都可以快啲（右中）。廁所的空間亦 just fit，啱啱好頂住對腳；見阿飛哥去便便個樣，就知道租客一定無可能會便秘（左下）。講完咁多，主持人亦提醒返有意跟飛哥搵食嘅收租仔要注意建築物條例（右下）。

飛哥話業主單身，一個人「住唔哂」４００幾呎咁「大」間屋，所以也可以留返一間房俾自己，租其餘四間房出去，物盡其用，提高收益，足證孟子謂：「天將降大任於斯人也，必先苦其心志，勞其筋骨，餓其體膚，空乏其身，行拂亂其所為，所以動心忍性，增益其所不能。」係無錯嘅，畢竟人性本惡善也（誤）。

＊＊＊
伸延閱讀：
Facebook： 80後樓神-吳龍飛 Victor Ng
DSE中作試答２０１９：讀書無用

（圖片來源：AAStocks, COB 18 Apr 2019）