單身狗３Ｄ屋

只係一隻單身狗啫，使唔使用成球嘢嚟裝潢呀（３６：０５—４７：５０）！

樓盤傳真 2018/09/15 2018/09/15 23:14

新地再出動高成數按揭吸客，低首期換來高額供款，一旦樓價跌，連本來已供滿的舊樓都會一併賠上！ 今集探討元朗 Park YOHO Napoli 按揭計劃的潛在風險。
大埔寶馬山坐擁海景及山景，業主自信滿滿，單位能否在淡靜的二手市場突圍而出？
何文田加多利山 KADOORIA 近億元單位，內櫳設計能否配合身價？風季來臨，請來驗樓師親授驗窗知識。
老牌屋苑美孚新三房單位，設計師打破傳統，透過超現實設計風格，令單位別樹一幟。

睇返個要求，好明顯就係要拆牆改建，同埋改開放式廚房，都唔知係單身狗戶主需要，定係大粒癦設計師需要：

７０７呎三房，一個人住真係好鬆動（左上）。大粒癦設計師將近露台房間拆去，改為工作枱，從露台引入光線；又將主人房門移位，增加空間納入套廁加企缸；廚房改開放式，並縮小大門後之雜物房改為衣帽間，自不待言（右上）。戶主用上跟魔術師一樣的電子門鐘（見《撳鐘仔ＤＩＹ》），大門後的特色牆以條子和鏡門隱藏房門，並造成凹凸懸浮３Ｄ效果（左中）。由於有露台引入光線，客廳以盒仔燈和射燈照明就夠；客廳備有三人梳化加按摩椅，６５吋大電視對住個窗（反哂光睇怕要落廉電視），並以玫瑰金屏風拉長電視櫃作配合；電視櫃用上Ｖ字型層架，櫃面所有嘢都會向下跣，好睇唔好用（右中）。書枱由幾片木組成，對住個窗，無書架可以放書（左下）。再行前就係露台，一氣呵成，相當開揚，不過景觀只見車輛離自己而去，風水上屬「送水（財）」格局，並首先體現在裝潢費之上（右下）：

特色牆後的隠藏門相當隱蔽，唔知夜晚黑唔開燈摸唔摸到（左上）。近大門的是衣帽間，離主人房最遠，裡面「衣櫃」扮成 boutique 設玻璃櫃，唔知係乜玩法（右上）。客廁牆係以六角形磚砌成，配圓鏡，型格洗手盆，電動廁板和洗衣機，但清潔用品就唔知擺係邊（左下）。一個人住唔知點解整咁大個廚房，仲要加個 island 同枱面；廚櫃以流線型設計，配合姣婆紅鋅盆，同埋特色吊燈，直叫人打冷震；抽油煙機喉管由假天花隱藏，引到窗頂的黑色燈光木櫃排氣；木櫃並收藏煤氣錶等物（右下）：

主人房門藏在工作間後面，同樣以隠藏式設計（左上）。主人房睡床又係以燈槽造成懸浮效果，床頭板以「精蟲」形狀的光管提供光源，話哂俾觀眾知戶主內心的渴望（右上）。主人房浴室門以漸進式磨砂玻璃設計，若隱若現（左下）；入到去有企缸同埋懸浮式櫃台，洗手盤則有啲似醫院用的女用尿兜，相當神奇（右下）：

睇完成間屋，魔術師不禁要問，吸麈機之類的大型家電可以放係邊呢？唔通係衣帽間？
＊＊＊
伸延閱讀：
撳鐘仔ＤＩＹ