轉數快於我何有哉？

魔術師真係唔明，我城搞個即時小額支付，搞來搞去搞咁多年，出咗咁多個 app 又電子錢包 PayMe 又 Tap and Go 乜又七，依家一個轉數快就好似 supersede 哂所有平台咁，係咪有啲攞嚟搞呢？


魔術師一向都有每日記賬的習慣，尤其是會對返 bank statement 做 reconcilation，一般投資理財以萬元為單位的計算已經夠煩，如果再加埋極細碎的小限轉賬，十幾蚊、幾十蚊咁以流水賬 log journal 的形式去記數的話，魔術師就真係唔得佢死...所以魔術師一向都唔係太喜歡做小限轉賬，就連可以綁定信用卡自動增值賺積分的八達通購物都唔會用！

（圖片來源：香港銀行同業結算有限公司 > 轉數快 > 關於轉數快, retrieved on 5 Oct 2018）

轉數快的每日轉賬限額多數係跟返銀行本身的小額轉賬限額。以魔術師生活基金成員來說，大貓的每日轉賬限額係我城貨幣（下同）＄１０,０００，對魔術師來說無乜實際用途，大額轉賬都係用返傳統網上銀行，又或者電子支票。美帝銀行就比較特別，未經登記的的未經登記收款賬戶，每日最高限額為＄５,０００，而已登記收款賬戶每日最高限額為＄１００萬，如果第日可以用轉數快過數到 Interactive Brokers 就好了。創傷銀行的每日轉賬限額都係１０,０００，一樣只係聊勝於無。

（圖片來源：花旗銀行 > 理財途徑 > 網上理財服務 > 繳付賬單及轉賬, retrieved on 5 Oct 2018）

（圖片來源：創興銀行 > 個人銀行 > 銀行服務 > 轉數快, retrieved on 5 Oct 2018）

又再以魔術師生活基金成員來說，大貓不愧係我城的龍頭大行之一，鼓勵客戶參加轉數快的現金優惠總額預咗有３球咁多；美帝銀行次之，都預咗有８０萬現金劵；創傷銀行就最細，就只係得６皮嘢現金回贈同埋３部智能手機抽獎咁大把！
畢竟只係轉賬，既然唔收手續費，呢個轉數快真係無肉食，客戶自己過錢俾自己都可以賺優惠，銀行做 promote 都係為「阿爺」（金管局）而已。

（圖片來源：匯豐銀行 x 轉數快 > 推廣條款及細則, retrieved on 5 Oct 2018）

（圖片來源：花旗銀行 > 理財途徑 > 網上理財服務轉數快 > 繳付賬單及轉賬 > 轉數快推廣優惠條款及細則, retrieved on 5 Oct 2018）

（圖片來源：創興銀行 > 個人銀行 > 銀行服務 > 轉數快, retrieved on 5 Oct 2018）