嘉里酒窖

是夜魔術師跟妹頭組，包括已轉會同業的妹頭洋腸上司比達。十幾人一圍枱要傾嘢本來就唔易，仲要成班人之間夾隻鬼就更麻煩。果然，返緊工仲要做工資奴的就講子女經，同埋問吓比達公司請唔請人；已退休的就講健康，包括食雞唔食皮（魔術師真係接受唔到，食雞唔食皮不如唔好食）、行吓山（魔術師腿傷後，蟻行者路徑就不了）、練下字（呢樣啱魔術師）、仲有人問魔術師如果退休有乜嘢做，會唔會做 youtuber 網紅直播表演等等，搞到魔術師都以為自己已踏入退休之年...
當然，由於同事間工資奴佔大多數，所以話題漸漸地傾向了子女經。魔術師開始感到納悶，好在帶咗左手邊枝２００９年男伯爵（Château Pichon Longueville Baron）去飲：

由於是日係放工後直接由公司出發，到約定的餐廳晚餐，魔術師當然唔會笨到晨早由屋企拎枝酒返公司再出發，最好就可以在網上訂貨，再指定送貸日期，直送到公司，最多提早去 Marketplace 買兩個紙袋來裝。魔術師用開呢間網上酒窖就完全提供到呢項服務：最低消費我城貨幣１,４００便可免費送貸，今天訂最快明天送（亦可指定送貨日期），非常貼心。

估唔到魔術師只係訂得兩枝酒，酒窖今日一早１０點便送到公司，仲連六枝裝紙箱一大個（魔術師都覺有點浪費）。魔術師捧住個箱返埋位，夠哂高調，搞到坐在魔術師附近的兩條洋腸過來八卦。有青同事 Chi Lam 竟然問魔術師一枝酒使唔使３００，魔術師只係話：「加多個位，１字喇！」

（圖片來源：Kerry Wines, retrieved on 1 Nov 2018）

不過，最令魔術師激氣的是，飯局中前妹頭組的車匙竟然話另外兩枝百幾蚊的酒好飲（其實係易入口），果然品酒人人口味唔同，Robert Parker 等評分只作參考。畢竟飲落肚的是自己，而唔係 RP！