2019年1月11日 星期五

歷任上司評

上文《險簽魔術師?》講到包青天上司都算係個好老闆... 查實魔術師的職業生涯中,做過自己直屬上司的人唔多,大概只有8人,而包青天上司就係排到第二位,僅次魔術師第一份工的「啟蒙師父」!

1. 上司F(男)
多年前都寫過上司F了(見《》、《第一份工》)。基本上佢呢個人無架子,當班手下係兄弟班,有火齊齊救;而且佢肯教人,知人善任。當時魔術師雖然係做緊電子工程師,但始終都係強於編寫程式,燒焊砌電路板就非魔術師所長;所以F就特意安排多啲 debug、troubleshoot、dry run 的工作俾魔術師做,起碼做起來有興趣有信心,而魔術師的本領,就係當年開始練起來。
記得有一次需要整一個prototype 來見大客「非離譜」,但公司手頭上只有6粒新產品 IC sample,一粒只能做一次 test,所以寫入IC的程式,最多只能錯5次...結果魔術師只係用咗3粒(即係只係debug 咗兩次)就完成!作為一個剛畢業不久的新鮮人,呢種成功感及上司對自己的信任,真係印象深刻,過咗廿幾年都仲記得。
當然,最令魔術師記得的就係F聘請魔術師的過程:
同個manager講左無耐,竟然見到一位物理系既同屆同學在走廊行過.打過招呼後,manager見我地係相識,便叫魔術師翌日上班,也不用再in了,理由係魔術師既同學工作表現不俗(其實佢都只係早魔術師一個月入職!)!!
評分:10/10(滿分)
2. 包青天上司(男)
最近年幾以來都有寫包青天上司,也不重覆了。佢都係個無乜架子,當班手下係兄弟班的人:同F一樣,佢自己一樣都係會落手落腳做的人。而最令魔術師欣賞的,係佢尊重魔術師的本領工夫(公司太大,有好多秘密資訊,唔係有番咁多年經驗係唔會知道的)、在公司工作多年的人脈、影響力(「識人好過識字」)、與及對公司文化的暸解等等...呢啲都唔係一般僱傭兵可以比擬的。當然魔術師在別人眼中都會有些「缺點」,最常見的就係「串嘴」:尤其是係對住班講多過做,思考又慢又唔 detail minded,成Q日老點的米帝米婆係可以完全唔俾面咁窒佢地...但包青天上司都算做包容魔術師的「任性」,真係算係咁。
包青天上司最令魔術師所象深刻的就是那種「男人的浪漫」:有次見魔術師晚晚都做得夜,便故意在公司「Me Me 摩摩」,等埋魔術師放工請食飯。魔術師曾經將呢件事講俾大舅母聽,大舅母的回應係:「佢又幾識做喎!男人嘅嘢,唔使講到咁白嘅,心照咪得囉!」
又好似今次嘅「險簽」事件咁,包青天上司知道魔術師已將職員證放返去辦公室,便特意 whatsapp 叫魔術師返到問口,call 佢幫手開門!其實辦公室內會有其他同事,魔術師在門口「撳鐘仔」就自然有人會開門...上司竟然會開門「恭迎」手下返工,呢個面真係唔可以唔俾喇!

評分:9.9/10
(註:比上司F差了0.1,係因為包青天上司未能教到魔術師太多 know-how...當然也因為上司F是贏在起跑線,現時魔術師的經驗當然不是當年的新鮮人可以比較。)
3. 妹頭(女)
一樣都寫過好多篇了。女人始終好難交心,同埋佢都係會在寫 appraisals 為咗 quota 而有所偏頗,放大魔術師的微小過錯來整低 rating,再將高 grade 放俾心腹愛將;但一旦要靠魔術師的技藝之時,又會「有事鍾無艷」了...後期妹頭組成為被開刀對象,佢先至開始「化」,肯對魔術師 true 一啲。

評分:6/10

4. 葵鼠(女)
有啲似楊千樺的中女。鼻樑有節,感情易受波節;門牙較大,易有 bias;所以妹頭開新 team 請佢嚟做魔術師、前同事A、同埋機械人阿頭的時候,係會「新官上任三把火」,懶係俾啲官威魔術師睇的:尤其是魔術師桀驁不馴,好多時都唔會 give her a damn,但有時有啲嘢又只有靠魔術師才做得好,咁先至激死人。
同妹頭一樣,到後期被開刀,被調到去一個更多以 pat pat 打招呼的偽 ABC 港女部門之後,就開始覺得難頂,才明白魔術師及前同事A 才是好同事。

評分:6/10

5. 美顏(女)
見人講人話,見鬼講鬼話。成日講到個 team 好勁,但係結果又係被公司話 cut 就 cut。魔術師被分手之後,佢都難逃一劫。又係只係公事公辦,不能與之深交的人。
評分:5/10
6. 上司K(男)
廿幾年前最初聘請魔術師入公的經理。魔術師一句話自己識得睇 machine code reverse engineer 返去 Assembly Language 呢項特殊技能,就賺得了一紙聘書。 佢呢組係木人巷,又係練功的最好地方,不過就係因為太重要,壓力太大,令到佢有啲不近人情。例如有次為電腦系統做千年蟲 testing,魔術師希望電車部唔好深宵打電話來,理由係反正即使魔術師解決了自己問題嗰 part,但去到第二組就根本無意即時修正,要等到第二日才處理,給果問題都不能解決,但就嚇親魔術師有心贓病的老媽子...但呢位上司K卻說:
你阿媽有心贓病係你嘅問題...
仲有就係,有一次魔術師以公司代表名義去了某個 seminar,紀念品是個手提電腦袋,但返到公司,K竟然伸手問魔術師上繳...真係 cheap 到呢!
評分:2/10
7. 上司S(男)
唔使講咁多,攏明玩針對,唔抵得魔術師學歷好過佢(見《兩枝金筆》):
直至數年前的某一天,魔術師的恤衫袋上還是插著一枝金派克上班,一回到公司,便收到某senior既求救,魔術師見佢錯得離奇,一面幫佢睇問題,一面開玩笑地講左句:「咁都錯得咁樣衰?」
誰料得來的卻是senior的老羞成怒的回應:「你而家話邊個樣衰呀?」之後更上鋼上線同魔術師既前老細投訴,前老細便以「對上級不敬罪」為由捉左魔術師去照肺,魔術師當然不會認錯,重申講明當時既語氣係開玩笑,想緩和一下緊張氣氛,小題大做的是senior.
前老細當然係幫住senior,照完呢次肺之後,仲「覆診」左幾次,奇就奇在魔術師以管理學中的雙向溝通的重要性向前老細曉以大義既時候,前老細竟然話響佢手下現代管理學係無用既.即使以管理來說魔術師係比佢熟(暗指魔術師當時讀緊既工管碩士),只要佢寫衰魔術師份快勞,魔術師唔使旨意有職升,花紅亦會少好多云云.
聽完如此奇異既講法之後,魔術師不忿,便決定轉會.再細想之下,原來自己係更不忿被人用錢撻,更可惡既係,佢用既唔係自己錢,而只係公司錢!為左顯示無人可以用錢「收買」自己,魔術師便計算好預期損失既花紅(即邊際遞減),原來只係小數目,於是便在午飯時間去萬寶龍買了兩枝金筆.
然後施施然返公司,在前老細面前拆盒,再將兩枝金光閃閃的金筆插在恤衫袋上.
評分:1/10
8. 黃C上司(男)
都係唔使講咁多,開會講100毛、仆街們GO,又嫌魔術師衣着太過身光頸靚(尤其是係條LV皮帶!),更毫無理由地要求員工在八號風球的日子 work from home,無規無矩,以為自己係大王(可能做慣細公司)...詳情可參閱《有個上司是黃C》、《八號風球工作天》。
評分:0/10
***
伸延閱讀:

第一份工
兩枝金筆
有個上司是黃C
八號風球工作天
險簽魔術師?

32 則留言:

  1. 上司來講, 好男>女>西男
    因為西男係又誅事八掛成個女人型咁仲要做唔到野, 玩手段又唔夠女人細心

    至於男人上司, 下下問候媽咪都係明天無事照食飯可也, VERY GOOD
    當然, 一個勁的男上司可以攤開D野照媽你可也, 同鍊車一樣, 佢一定快過你, 但係副ENGINE係會即時TUNE快左9倍,受益不淺

    回覆刪除
    回覆
    1. 男人係直接好多嘅!所以 camp camp 地的黃C上司,成日轉彎抹角,我就唔係咁 buy 嚕!

      刪除
  2. 題外話:
    <>條link好似同<>撞咗

    回覆刪除
    回覆
    1. 留意半形<>係會食HTML的,寫咗會等於無寫。

      已尋回錯link並更正,謝謝。

      刪除
  3. 我最怕D操控狂,自己唔想做或做唔掂既,就推哂比你,而且成Q日問點解做唔到。escalate 比佢都冇用既廢人。

    回覆刪除
    回覆
    1. 沉醉於 micro-management 的管理層真係好難頂。

      刪除
  4. 講開老細,我而家掛名呢個(掛到下禮拜三)真係奇葩,起碼對我既態度係

    呢個weekend睇下寫啲分享下

    回覆刪除
    回覆
    1. 小弟好少在魔兄地盤長篇大論寫自己嘢,但今次一定要借題發揮一下。

      我是在15年7月入職現公司的,面試同入職後的直屬上司係A(美帝expat),R(傷民)係A的上級,在welcome lunch見過面,但飯聚間同之後兩三個月同R交流不多,只知道R經常隔空向A的其他下屬發指令。

      頭兩三個月未過proba期間,A指派俾我的工作都比較瑣碎(但A會經常問起),所以工作量頗為輕鬆;同R的第一次深入“交流”,是剛過proba前幾日,俾佢睇到我辦公時間上工作無關的網站(唔係伊謝爾倫 XD),當場鬧咗幾句,過咗陣召我入房,叫我講呢幾個月做過啲咩。事後自己都知衰,即使比較得閒辦公時間都比較注意。

      到15年10月,R首次直接指派工作:用一粒新chip起一壇新system,prototype板是一早做好、原本俾我接手嗰個人搞的(但我入職前個零月已經離職),我最主要工作是將舊chip的fw移植到prototype板的新chip上(其他讀者未必知我講乜,但魔兄肯定明白)。期間發生以下事項:

      - A在蝗廠的一個蝗下屬、好似高我半級的J,漸漸de facto成為我要direct report to的“上司”
      - prototype板一直遇到技術問題,直至16年1月底終於發現問題,靠大幅手改hardware先實現到功能;三個月期間小弟當然受到來自J的直接壓力,R偶有施壓但直接交流仍然不多
      - 期間A亦指派了一個新功能的study,寫了一份ppt,經過A過目後,我同A一齊向R做present,點知俾R彈到一文不值。小弟自問在第二份工被當時上司日日施暴式培訓後,寫包括ppt的技術文件算係有返咁上下,所以得到咁既評語都好意外,而且同舊上司每頁每句明確地插唔同,R只是很籠統地講出自己觀感。呢份ppt仲係我呢部notebook內,我刻意開返嚟睇但都remind唔到R個評語係乜

      到16年過年後,A正式坐歪,R變咗我直屬上司,此其時至18年過年前,呢兩年間概括如下:

      - 小弟工作算是進入狀態,除了R主導的示範項目外,亦經常參與ad hoc troubleshooting,做下救火隊之類,也算解決過很多問題
      - J亦成為R的直接下屬,但仍是de facto小弟要report to的“上司”。雖然從來無人口頭上或白紙黑字交待過我點解會under J,但我都不打算challenge
      - R同我的主要工作地點都在蝗廠,R經常會對各編制上非其直轄下屬的同事過問工作或談笑風生,但唯獨是對我極少直接交流,就算參與R的項目如火如荼期間,公司內對我都係踮行踮過
      - 小弟都算完成咗幾個示範項目,可以俾R去present俾其他部門,但奇怪地各種present的場合R都很少要求我在場,反而會叫一個無參加開發、貌似R的愛將巷漂F參與
      - 某些項目F應該受到指令要參與“監督”,但在從來無人事前交待過下,由不論經驗及職級都遠低於自己的F參一腳,是可忍孰不可忍,在小弟屢次強烈態度表明“誰要你這樣跟我說,叫他直接來和我講”,F亦知難而退
      - 小弟同蝗廠很多同事關係都不錯,有傾有講之餘閒時亦會幫佢地帶下貨;因為解決過很多問題,算係有啲reputation,所以很多比較green的engineer都會主動問我技術問題,而即使與我工作無關,有時間的話我都會答得就答
      - 小弟參與的R主導的示範項目,似乎R最後都sell唔到其他部門落搭

      在17年底,聞說R同其老頂D好似公司內部權鬥輸咗,D帶R準備另建新部門,並於原部門挖一批人離巢;期間R同我的交流才大幅增加;到了18年過年前後,新部門正式成立,小弟“被”過檔,其時交流次數達至高峰...但最後的轉捩點就在18年4月間發生:

      在17年下半年,兩項工作x同y都提上議程,但x比較緊急同容易,所以一直都是全力做x,亦有一些階段性成果俾R present過;過檔後,小弟從R和J收到的信息都是繼承x在舊部的工作,先將其完成。但在小弟4月將一些x的成果當眾present給R時,R突然變臉,話“你俾x啲嘢我睇做咩,我仲以為你講y,y啲嘢你做過未”...如果當時我有鏡照自己個樣,我應該即刻知道“吹鬚碌眼”原來係咁樣!

      之後直至現在的一連串事是:

      - J聲稱y一定要在同年8月可階段性向其他部門present,否則小弟的職位亦岌岌可危,並要求我每禮拜寫email向其report進度;但其實邊有咁多進度好講,慢慢到8月之前J過問的次數亦越來越少
      - 到8月有啲階段性進展,但所謂的“需要向其他部門present”並無出現,J換咗做第二句“y在其他部門已經有現存方案用緊,部門批的預算在y上只是很少,如果你不能證明有y的方案值得取代現存方案,部門可能沒有留你的必要”
      - 到了10月,小弟終於成功“靠證明無關自己能力既嘢係得,來證明自己值得繼續存在”;但到11月部門才指派另一個同事幫手做prototype板。在此之前,小弟是不折不扣的one man band,全力支持的供應商仲似自己的同事
      - 因為我只負責y,而且進度不完全在我掌握,所以越到後期工作量越少,經常返工無所事事;但我知道部門其他項目非常忙碌,而且越來越覺得自己不是部門自己人
      - 從4月之後,除了一次,R再無同我作任何超過3分鐘的談話,兩三次“談話”都只是一句起兩句止;不論在蝗廠或巷office,R對小弟都是視而不見,even我遞埋辭職信都是如此
      - 該唯一一次談話,發生在去年是在蝗廠一個public area遇上,R捉住我哦咗一輪,我最記得一句是“你係呢三年都毫無建樹,出年個apprasial你想我點寫呢...”
      - 12月初時,我無意間發現一個新來、無介紹過的部門蝗同事L在做關於y的事,我當時已經心灰意冷全力搵工,也並無在意;但在辭工後,J交待我要向L做handover,我在1月交接期間,發覺L只係做咗兩年嘢,而且完全無相關y、甚至pre requisite的經驗,而且L話剛入嚟時唔係安排做y,係突然安排的...




      ******

      從上文,都睇得出大部份時間,R對小弟都好冷淡;而點解3年半生涯,我要將15年下半年寫得特別清楚,係因為16年起,cold shoulder已經成為常態,我都好想知道有無高人可以借開頭半年的事情,推測到我會被冷淡對待。老實講小弟做嘢咁多年,都得罪過好多人,亦知道點樣得罪法,但對呢位R,小弟真係諗爆頭都唔知得罪佢啲乜--因為自問連得罪佢既機會都好少!

      小弟都見跟過好多上司,有好肯教但後期變到日日鬧交既、有少少賣我豬仔成份既、有日日無理取鬧想逼我走既...當然好多都一直關係好好既。但就算包埋魔兄提過的上司,起碼佢地都會負責manage下屬的工作,同你鬧交起碼表達對你工作有要求,只是manage得合唔合理而已;好似R咁,主動放棄親自manage改用冷處理(但又長期有工作安排和唔lay off),實在未聽過。我有次見工撞到舊鬼佬上司,佢直接一個反應:“It's weired!”

      最奇怪是:你想搵人替我,又事前唔同我講,照計應該搵個有經驗的;如果似L全無經驗的,咁就算我未辭工,都起碼搵我同佢work一排再飛起我唔遲。但似乎佢地個態度係:L同我各自活在平行時空,L之後pick唔pick up到再算。對我交接的管理亦非常lausy,幾日都無人過問過我同L講過啲乜。所以我不停向L植入意識:如果你過多兩三個月都無進入狀況,一定要向上面反映...我呢啲老鬼俾佢拖大半年,唔會忘記以前的工作經驗,但你是正需要快速累積經驗的時間...

      而家我在這裡仲剩三日,不過相信R聽日就已經上咗蝗廠,我last day前亦鐵定唔會再有交流,所以可以蓋棺定論:

      評分:負分/10,小弟唔算貴但亦不太平,其長期用silent treatment代替主動管理下屬的工作,絕對是主動逃避自己scope of work的表現!

      刪除
    2. 呢一篇我要消化下先...遲啲再覆...

      直觀上覺得R係我個上司S同埋黃C上司的混合體.

      刪除
    3. 有時唔合眼緣, 係無樣睇
      如果對家R係啲特別"古叔"的男人, 或者係中年單身女性, 更係令到出事機會大增
      而摩兄無特別"上力"到R玩埋一齊, 亦都係self-fulfillment prophecy, 令到成件事變得合理化

      刪除
    4. 路過, 衰老細見唔少, 但咁樣專搵人笨既腦細, 應該係稀有品種

      佢冷落你但又肯養住你, 應該明白你實力唔係問題, 但不停搵你笨既原因, 不是 for some reason 十分討厭你這個人, 就是佢自己都不斷比人搵笨, 故此需要一個搵笨對象

      前者的話, 我諗摩連奴兄係咪一早就覺得佢唔鐘意你, 所以有意無意反映在態度上呢? 又或者, 早期請你回來的A會不會是R的敵人, 故此沒法安心把重要的工作交給你處理呢? 雖然臨別在即, 如果我係你, 應該會找個機會同佢好好坐低傾下

      刪除
    5. 哈,呢位奇葩R果然引到大家回應 XD

      順便補充幾句

      - 整個16年,其實我都好怕主動同佢講嘢,因為經常一開頭稍稍唔到題,就會被佢搶白一輪然後打發我走。當然小弟做咗engineer咁多年,不諱言染咗職業病:講嘢永遠唔敢100%講實;蝗同事們亦話R個脾氣就係咁。但我冷眼旁觀,發覺即使有啲佢勁插既同事,都係插完再傾傾完又插,唔似我咁被冷待。
      - 我記得16年一個project係同一個蝗同事H work的,當時做到如火如荼晚晚OT,但R check進度從來只會打俾H,即使明知我在旁邊都唔會group discuss。其實佢到現在都無我電話,只係經過WeChat group順便加咗我WeChat
      - 以上情況17年開始好轉,到17年Q4至18年Q1仲接近正常化,我都以為無事就再無深究,況且我心諗你如果唔老嚟我都情願留我係舊部門自生自滅啦...點知後來仲衰過舊時
      - 我同R都係傷巷contract,公司formal編制我係直接under佢的,J並無任何角色;即使佢assign咗J睇住我,亦唔係當睇我唔到的原因,因為佢經常會同不同職級同事跟進工作同吹水,即使不是直接under佢

      //呢一篇我要消化下先...遲啲再覆...

      信息量太大,到我要等埋魔兄勒! XD

      //直觀上覺得R係我個上司S同埋黃C上司的混合體.

      S同黃C起碼有盡上司最基本責任:主動管理下屬,包括向下屬發指令同方向,只是合不合理而已;而R是由冷待到撒手不管,就算從公司management來講,都係主動浪費公司資--我都出緊公司糧的。

      而且相對S同黃C,R是極少單獨同我講私人或工作以外話題的,即使關係比較close的階段亦如是。

      //如果對家R係啲特別"古叔"的男人, 或者係中年單身女性, 更係令到出事機會大增

      R係70後男性,都係我同魔兄一袋人,鄉大電子畢業,不過睇LinkedIn佢一出來就做sales,從來未做過技術工作。

      佢在group lunch提過以前讀書時是玩得好出位、好sociable的人;睇佢對其他人亦算符合呢個形象。

      佢在巷office間房開conference call通常會開喇叭唔用headphone,自己講嘢又hyper,間房隔音又唔好,週遭同事間中都有微言。

      //而摩兄無特別"上力"到R玩埋一齊, 亦都係self-fulfillment prophecy

      我不算十分同老細或上司埋堆的人,但大家岩嘴型的話亦不抗拒,未熟絡時亦不會刻意avoid.

      問題係佢一早就拒我於千里...

      //但咁樣專搵人笨既腦細, 應該係稀有品種

      稀有品種就一定,但在舊部門我覺得都唔算搵我笨的,至少我有實際工作,不算投閒置散。

      當然舊部門人多,有啲工作唔係R直接assign,而係搭下搭下搵到我幫手的。

      但新部門y呢壇嘢就真係搵笨實,完全係食之無味棄之可惜的垃圾工作(不過明顯R自己唔想放棄),只能望半新鮮人L自求多福。

      //佢冷落你但又肯養住你, 應該明白你實力唔係問題,

      或者佢只係唔想主動lay off我,以後難加返headcount而已...但又解釋唔到點解會主動搵我過檔

      之前佢嗰句“你三年都無建樹”,我心諗你即係計埋舊部門嗰兩年啦...咁嫌棄又叫我過嚟?不過我覺得R係好介意我有份參與既project都sell唔到俾其他部門的。

      佢眼中我有無實力我覺得都唔係重點了,我做既嘢佢從來都sell唔到的確係事實,亦好難講邊個責任...但佢係我老細,插我係天經地義的,起碼佢要令我知道佢想我點...而佢好少主動咁做

      //佢自己都不斷比人搵笨, 故此需要一個搵笨對象

      佢的business model就係要條team不停出嘢sell俾其他部門用,某程度係“自己搵自己笨”,所以我做啲嘢佢sell唔到,可能佢好耿耿於懷,覺得我搵佢笨就真

      //又或者, 早期請你回來的A會不會是R的敵人, 故此沒法安心把重要的工作交給你處理呢?

      撇開非理性原因,我覺得這是最有可能的:小道消息A不算R的敵人,但R的確不滿意A的工作方式;而我被其冷落,可能同啲領隊冷落啲唔係自己買返嚟既球員、特別是老細或技術總監塞俾自己既一樣。

      我有個波友在對家做,之前介紹我見過工,但有個蝗大佬覺得我唔係perfect match;我波友話佢落多啲嘴頭功夫就得,但我經過今次教訓,都話唔使了。

      //我諗摩連奴兄係咪一早就覺得佢唔鐘意你, 所以有意無意反映在態度上呢?
      //有時唔合眼緣, 係無樣睇

      可能講到尾,這是唯一解釋...人的情緒同喜惡,有時真係無理性原因的!

      刪除
    6. //雖然臨別在即, 如果我係你, 應該會找個機會同佢好好坐低傾下

      傾乜鬼,如我所料佢今個禮拜都唔在巷office,而我得返兩日都唔會再上蝗廠

      我是24好辭職的,當日佢唔係度,我係send email通知佢;到27號咁岩我又sick leave(踢波整親手痛到我通宵訓唔著),封hardcopy係部門秘書交俾佢的。

      以前我辭職,上司或老細都會係咁易坐低吹下水的...但27號後同R撞口撞面,大家都係繼續各自修行

      另外一個蝗民對“垃圾工作”的定義(y呢份工作,中咗起碼5項):

      分析你手中的工作是否是垃圾,有以下十个标准:

      垃圾工作十大标准  

      1 没有具体交待时间    
      2 没有具体进程安排    
      3 没有明确完成时间 
      4 没有明确工作量大小  
      5 没有具体质量评估指标    
      6 没有奖励、或惩罚措施    
      7 封闭式,单独完成  
      8 负责高管不详    
      9 负责高管过多  
      10 可随时为其它工作让路 

      只要具备上述十大特征中三个以上者,就已经接近垃圾工作这一范围了。具备上述十大特征五个以上者,就可以确定其为垃圾工作。

      刪除
    7. // 但又解釋唔到點解會主動搵我過檔

      呢個係最吊鬼嘅地方. 咁憎你, 又搵你過檔?
      我諗到嘅係.
      佢其實唔想過新野. 但係被迫過咗去做, 人又俾埋佢.
      佢可能諗. "我拉你過檔. 你自己走又好, 俾人LAY又好. 總之就話, 唔夠人用, 不如摺咗佢." 咁佢就有機會返去舊時嗰度做......

      刪除
    8. 今日下午無意中認識了一個公司老臣子,聽佢講左啲內幕,發覺如果唔用「無理由的情緒喜惡」做理由,都勉強可以將成件事用利益關係串埋一齊的。反正現在已進入名正言順混時間的狀態,明天早上寫埋佢。

      雖然無辦法證實個解釋是否真相,但即管當真的話,真係長見識!

      刪除
    9. R的強項可能不是技術,理應夥拍術能力強的人;但他卻好像不懂管理技術比自己強的人。

      另外,看來該部門不是核心部門,R在公司內部地位也似乎不是太重要,故就算沒有人做事,影響也不大。如果是核心的工程部,會被生產部門要求不停改這改那,以求提高生產效率;如果係R&D, 被會marketing不停要求出新產品⋯⋯那會有空閒做垃圾 project 呢?

      刪除
    10. 多謝各位踴躍為摩摩解感,我都出咗一篇文,以作呃 quota 之用 XD

      你既無心我便休(條URL好頂癮!):
      https://magicianyang.blogspot.com/2019/01/sales-technical-background-lead-sell.html

      刪除
    11. Tammie君推測部份正確。

      留返「有幸」成位正文嗰邊再覆。請呀~

      刪除
  5. 睇完魔兄一文。小弟都要小心言行,以免被同事評為零蛋上級...呵呵!

    回覆刪除
  6. 年輕時我曾經遇過一個超好的上司,就算要減一點工資,都願意為她做事;最近幾年也遇過一個令我很痛苦的上司,夜晚瞓覺曾半夜扎醒就是因為夢見她。XD

    無論好,還是不好,都是一種經歷,回頭細想,她們或多或少都幫了我成為更好,很可能幫助最大的,反而是使我最痛苦的那一位。

    可以一起工作,是緣份,無論結果如何,總有緣盡之時,也總有值得記取之處。所以呢,每一位上司,無論使我愉快或使我痛苦,有時間將這些經歷寫下來,日後回味,相信是一件有趣的事情。

    回覆刪除
    回覆
    1. //無論好,還是不好,都是一種經歷,
      //她們或多或少都幫了我成為更好,很可能幫助最大的,反而是使我最痛苦的那一位。

      哈哈, 黃C上司真係令我長了見識.

      ///可以一起工作,是緣份

      咁要點返首歌,加咗落本文楔子度.

      刪除
  7. 好上司難求矣!最慘遇到啲講多錯多,之後要同佢補鑊。

    回覆刪除
  8. //8. 黃C上司(男)
    應該係黃C上司(男/女)XD

    我啲前上司現任上司幾乎全部都係女,所以有時都幾奇趣(-.-),習慣咗都其實唔難相處嘅。

    回覆刪除
    回覆
    1. 見你咁細心(尤其是「塞內設計」的留言),就知你經常往女人堆裡鑽。 XD

      刪除
    2. 好在有幾個係老外比較"男人頭"直接了當,以前有個笨土嘅好飄忽情緒化。不過細心就中外女性都比較看重(尤其最近為米爆做準備工夫真係唔細心都唔得,忙得我連上網都冇乜時間)

      刪除
    3. //不過細心就中外女性都比較看重
      我嘅經驗就係笨土中女(60歲都仲係中年人)會比較 detail minded (aka picky);老外女性就一半一半,有部份都幾 hea.

      //忙得我連上網都冇乜時間
      唔怪得你失蹤咗一排喇!

      刪除