考試後感

尋日（3 Jun 2007）響亞洲博覽館考完CFA Level 2 exam，上下午各考三粒鐘真係唔講得少，對精神力，專注力同體力都係一項考驗．


趁墟

例牌每年Level 1都勁多人考，又勁多人肥，近年合格率只得３０－４０％．觀乎考場，果然有好多「○靚仔」去考，有唔少甚至都好mk look添．雖然話以貌取人唔岩，但係再睇返level 2既考生，mk才俊的數量大減，留番落黎既大部份都一ｄ外表較成熟既「沙場老鬼」，可想而知呢ｄ岩（或即將）畢業既青少年，想合格既話，就要改變下玩玩下唔專注既態度啦．

盜版

魔術師幼承庭訓，一直以來既讀書方法，都係腳踏實地既，既買textbook，又買雞精study notes，投資（真係明書本既知識）同投機（學考試技巧）雙軌並行，所以特別唔喜歡而家ｄ家長同學生果種淨係為考而學既功利態度．

而最覺障眼既，就係場內大部份（目測超過８０％）考生拿著既都係盜版study notes．喂，報考一次都三千幾蚊啦，真係唔知慳果一套notes（都係二、三千蚊）做乜．其實就算好似魔術師咁買齊所有野，都只係一萬幾千，考得呢ｄ專業試，照理都唔會將呢畢錢睇到咁大卦？

各位用盜版既考生，請遵守codes and ethnics，專重自己和知識產權．

差一分鐘

魔術師考試時不嬲有個「好習慣」，就係唔會作最後衝刺，因為要識既已經識，最後溫習起到既作用已經不大，倒不如早點入試場準備，提昇自己對試場環境同氣氛既適應度．

和魔術師同樣做法的考生雖不乏人，但係更多人就係要溫到最後一分鐘．結果尋日朝早，９點開考，０８５０考場已宣佈閂門並暫停check-in，開始派卷同俾時間考生檢查試卷，填寫名字，考生編號等．而遲入場既考生，就要等人開始哂先可以check-in，又要排隊，對身份證，檢查計數機等，大大話話浪費十分八分鐘，都唔好話唔無謂．

其實呢個安排，考Level 1既時候已經係咁，當時魔術師見住好多「○靚仔」就係咁中招（慣左平時考試？），level 2既考生都會再犯呢種錯誤，實在奇哉怪也．

監考

裝試卷用既紙箱同考生檯面上既label，都印有「香港考試局」字樣，咁ｄ監考又會係乜人？睇個樣又唔似係CFAI派出黎．

最搞笑係，考完後所有考生都想走，但係監考又未點完卷，未放得人；咁阿主監考官就嗌咪話唔留係位既就擲名，又話唔坐定就唔放人，好似老師罰學生留堂咁．

唔，最重要既係，魔術師坐Hall 6 Zone SS，見到隔離Zone有個監考妹妹，著長裙，個樣好可愛，我諗我都用左好幾分鐘去「痴痴地」去望個監考妹妹！

小統計

由中學到大學，都會聽到人話「讀得書既女仔，個樣都．．．」

雖然呢句話未免以偏蓋全，但係以尋日ｄ考生黎講，呢句hypothesis，以目測來說，都fall into 90% confidence interval．

補鑊：唔，讀得書而個樣又．．．既女生，又唔會去考呢ｄ試啫！
2007/06/04 12:52:50