教小朋友

日前，魔術師在坐巴士途中，聽見一位媽媽在「教」女兒唸乘數表：
母：九一！
女：九一如一，九二一十八，九三二十七，九四三十六，九五．．．九五．．．九五終四十．．．
母：八五先至終四十呀，九五又終四十？九五！
女：九五．．．九五．．．我唔記得．．．
母：咁五九呢？
女：五九四十五．
母：九五咪四十五羅！九五！
魔術師微一側頭，從玻璃的倒影見到那女孩大約六七歲，那媽媽則不知年紀，但肯定佢唔係咁識教，淨係識死背．
呢件事令魔術師想起之前在新聞組既討論．．．
幼兒高班學乘數表?????
1.橋治
乜香港依家o的教育?
仲真係以為幼兒學愛滋基魔人冰屋係小數。
仲要學埋司馬光
咁小學會學o的咩
唔通係微積分?
咁中學一定係學點炒窩蛋做CEO
究竟所謂通識教育，係更加教蠢人，還是還原基本步
對我來講，小朋友，係應該教佢地玩多o的遊戲，等佢地自己用下個腦，點玩得叻o的。
點可以同其他小朋友相處得好o的。
丁咁大個，教乘數表做乜seven呀
電腦時代，乜info都可以上google搵
真係教咁多入腦，考咁多無謂試，唉
2.脫苦海
我未做人爸爸，亦無任何年輕親戚比得我教，唔敢講乜野教細路知識
我只係觀察到，越來越多父母在童年就灌輸一個抽離的世界觀比小朋友們,令到佢地唔知道呢個世界有窮人，有慘事，資源不足事事要與人爭，嘆冷氣有車代步是必然
由細到大都唔係住在所謂中產區，所以亦沒有所謂中產惡習
龍會上天蛇會落地，千祈唔好教仔做中產
另外一樣成日見的係，家下ｄ細路仔好鐘意欺負弱小（包括女童同菲傭）
昨天在電梯又遇到一個這類小霸王，追住個妹妹黎敲頭
小朋友，你做得最錯係，明明我要出電梯，你做乜野站在我門前？你以為我會讓你嗎？
3.楊威利@上海
我自己較認同佐冶兄所講，教小朋友應以遊戲方式去教，訓練下佢地思考，用下個腦
先唔講價錢，或名唔名牌，我自己見到既係，較commercial既幼稚園會以五化百門黎吸引d家長去報，例如佐冶講既幼稚園教乘數表，可能會心得好多父母心，因為佢地會覺得自己個細路早學識=勁，比人叻．
我自己舊年幫個仔搵幼稚園，做左D research，一般價錢較貴同有名氣既學校，其實唔會搞太多花臣黎present自己有乜有物教乜教物d老豆老母揀既時侯好多時因為佢地有名氣，同時又嫌佢地冇乜花臣，入學後就會花大量時間同金錢要個細路返好多課外活動學琴，學日文，學數，學phonics，學英文，學呢樣個樣，即使我自己有細路，對佢有期望，但見到咁我都鄧佢辛9苦
唔知呢，讀書叻唔叻都好，我覺得較貪玩既細路係較醒目，讀書唔叻，只係冇一個方向指導佢only
睇黎小學要教個仔炒期，初中可以俾佢落場，高中可以教雙龍閃了，咁讀唔讀到書都冇乜所謂 (不過我老婆會斬死我)
＊＊＊
都係個句，現今父母灌輸太多對於小朋友未必需要學到既知識只為一己私慾，因為要show　off話俾人知自己個細路識乜識物．因為事實上一歲之後既小朋友學習能力的確好高，不過只係未必懂得表達出黎，父母就濫用左呢個小朋友既天賦，學埋好多要show off既野．
至於欺負弱小，莫講話香港，而家係上海我見個仔幼稚園d 同學仔爭親玩具一開口就攬住先，之後加句"打死你"
我始終覺得學校係學知識既地方，父母點都要教個仔學與人相處，然後係學校實踐．
***
冇法, 最慘既係學校所用既適量既教訓小如罰抄都會俾家長投訴
亦最慘係以自己細路為如豬如寶既父母又唔會去理解同個細路一齊癲埋一份
十年一個gen的話, 我同你都見到對上個gen 生出黎既細路, 即現今既大學生有幾出類拔箤
如果而家都唔打算將呢d 飯來張口既生活改善矯正, 我好難想像佢個代會係點
4.脫苦海
你有實力打死人，都唔駛話比人聽，亦唔駛做出來
而家ｄ細路，無實力打人，已經想講出黎大人，甚至想付諸實行
結果咪係撞板
同人相處，有ｄ人幾十歲都唔係好識，何況ｄ細路仔？
呢個世界分庄閒，莫講大多數人唔係庄，就算做到庄都唔可以趕絕人
偏偏好多做閒的人以為自己做庄，又或者做閒的以為自己可以趕絕人
例如有小學老師同我講，ｄ學生似住家長會投訴，就以為自己係校長
結果呢ｄ人長大以後出到社會又會點？皇后碼頭訓左一大班。
5.笨發
我唔認為今時今日仲可以用過去天生天養的方法去教細路，畢竟現時社會較過去二十年都有好大改變，e．g．以前周街玩會俾老母打到飛起，而家仲係咁，可能佢會被人告虐兒．
但我覺得萬變不離其宗，就係等個細路學識基本做人處事，同人交往的準則，盡量有一個開心快樂的童年ｚ（not 物質上），等佢有較正面的思想，有同理心，我相信咁樣比一切硬知識黎得重要．
個人經歷係，十幾歲（中學）要我重新學做人處事，可以，不過要花好多年先可以tune好．相反，即使二十打後先開始學硬智識，even最難的語文，亦不見得太難上手．
眼見所認識的朋輩（有唔同年紀），生活得較愜意及事業/家庭上較有成就的，都有共通點，就係有同理心（待人以寬）以及思想正面．雖然佢地未必係最聰明學野最快識最多野的人.
如以IQ，EQ，AQ及FQ人生四大Q去睇．
IQ無得講，好似小弟呢d笨人可以生出d乜野優良後代？唯有努力d幫佢搵個好d既阿媽補救下.
至於EQ及AQ，則和思想正唔正面有很大關係了．
而呢個版的版友普遍都有很高的FQ，要點學唔洗我講了．
四條Q，我覺得同樣重要，無話邊樣俾邊樣要緊d，而有晒4Q的人真係唔多見有．
不過從功利及效益角度去睇，我認為花十年八載培養小朋友的EQ、AQ,會著數過教佢太多硬智識囉~
6.楊威利@上海
講起EQ同AQ，講下最近同一個小朋友既相處
有次同朋友一齊食飯，席間有個三歲小朋友，我請佢食左一塊餅
之後問佢可唔可以俾佢媽咪食，佢遲疑左一陣，我話最後一塊架咋，你諗下俾媽咪食定自己食唔夠5秒就大發脾氣，掟走塊餅之餘又打亞媽
據我觀察呢位小朋友係較喜歡食野，係食物上面可以話係要乜有乜，一個三歲小朋友見到碟雞已經識講「我要雞翼」
呢4Q的確係雖要好長好長既時間去倍養出黎，除左FQ你可以當功課咁俾多d exercise佢做外，其餘既你要陪佢俾佢見多d，知多d後再從旁講解先得吧？
＊＊＊
兩種教仔福佳方法

1.脫苦海
A.８歲讀三國演義，教你花去兩成家產
B.躲在家中睇電視喊窮，乜Ｌ野都沒可能
2.橋治
其實阻力最大來自你老婆，同埋外公外婆，
自己老豆阿媽，一樣可以丙爆佢，咁就唔會害你既下一代
同埋唔可以只係要個仔去做
而係要講俾佢聽，而且係要在不同時候講
同埋聽佢既回答，因為小朋友會怕左你既淫威
但聽左佢講，再同佢negotiate，咁又係另一個故事
＊＊＊
一定一定由細教到個仔大，一切都要自己努力爭取番來
一定一定再一定，超一定，同學仔有PSP，係同你無關係既
無任何值得既理由，人地有，你就要有
如果有朋友送野部PSP俾你個仔，你要教個仔自己掉左部野落垃圾桶，同埋講多謝
下次唔使買呢o的野。
人性之中，最可怕係呢樣野，人地有，所以我要有
教小朋友，最重要一樣係價值觀
3.Cory
真係咁極端既話
坦白講，除非你生個仔叻仔，曉自己向上爬，否則你既小朋友日後會好孤獨
4.Thomas
最最緊要係同一陣線，口徑一致，不可以有醜人好人．要俾個細佬搵唔到任何靠山．
＊＊＊
魔術師憶起去年新部門主管初來步到，便宴請我們一眾同事吃飯，兼介紹一下自己．輪到我組既機械人時：
機械人：我係ｘｘｘ組既，日常係做ｙｙｙ．．．興趣呢，我細個時都學過彈鋼琴，不過而家無彈咯．
新主管：點解而家無彈呢？
機械人：因為細個時發現做鋼琴家係好難既一件事．
原來細個學鋼琴係為左做鋼琴家？做唔成就唔彈？呢一類人，唔會知道咩野叫做興趣和自我既滿足感．我再諗返舅父舅母，十幾二十年前已經會漏夜去排聖乜乜幼稚園報名．而家，個大仔雖然話響港大讀PhD，但係做人就on居居，唔係咁機敏；個細仔仲慘，讀band 3，今年考會考，都唔知會考到咩野大頭佛出來．
果時已經係咁，而家ｄ「中產小朋友」就要學心算珠算圍棋又乜又七十九幾萬樣野，唔係考唔到名校幼稚園同小學，真係唔怪得要四百萬先養到個仔啦．
但係，ｄ父母又有無諗，有幾多野係好似「機械人學過彈鋼琴」咁，根本學黎係無無謂謂？抑或係人地（同事朋友）個仔去學，自己個唔學「就會好蝕底」呢？
2007/06/21　14:40:05