再回頭已是沒法追

話說魔術師公司部門僱傭兵比例都唔細，無８成都有７成；而到咗年尾，眾僱備兵最關心的就是續約事宜。自從年中有班米腸同米婆走來搞什麼 Project Director，大削我城 run project 的權力之後，魔術師便料到年尾傾續約事，米國那邊一定會拖了又拖，唔緊唔賴，於是魔術師便策略性地在預留年尾放大假，自製提早「last day」，唔使坐響 office 都唔知過年時係 Business as usual (BAU) 好定係等收爐好。
果然，兩個星期前，包青天上司傳來電郵給一眾僱傭兵，謂米國已批准了 budget，所有僱傭兵都係以 same terms and conditions 續約。
魔術師心中暗笑，果然不出所料，米腸係石頭鑽不出血的，與其給港豬加人工，倒不如給自己友無厘頭飛來飛去開埋啲無謂會，順便去ＬＫＦ同班偽ＡＢＣ港女用 pat pat 打吓招呼，打返幾場友誼波咁。
講返 same terms and conditions。奇怪的是，包青天上司卻當是沒事人似的，照常跟魔術師等僱傭兵傾明年一月時要做什麼什麼測試，當正眾僱傭兵都會照簽約一樣，絲毫不怕１月１日無人返工，大失預算。
又因為包青天上司的電郵在「same terms and conditions」有寫，如果有乜問題，歡迎約出來傾吓，魔術師當然就不客氣了。
去到約定地點，包青天上司劈頭便話「都明白眾兄弟點諗嘅」，跟住就係講話「早前有 team lead 遞上去話加某僱傭兵８％人工，簽兩年約，結果就俾米腸 project director reject 咗，話唔加人工，簽返一年」，並叮囑魔術師唔好同人講云云。
跟手，包青天上司又話部門裡有幾位同事付出同收入係唔相稱嘅，而魔術師會計又得，中英文寫嘢做 presentation 又得，睇 technical 嘢又得，論 attention to details ，甚至乎得力助手Ｌ都達唔到魔術師的層次，users 又喜歡找魔術師幫忙（因為魔術師從來唔會耍人，俾嘅答案又 firm 又 work），基本上在組內是無敵的，理應加返啲，但因為預算問題，都只能以通脹率作為 benchmark 云云，叫魔術師「使唔使用計數機計吓」、「唔好唔開心喇」咁話。
查實魔術師無唔開心，只是肚裡覺得好笑，見包青天上司 set expectation set 到咁，都唔想佢太難做，便說：「唔使嘞，所有數都在我心中。」於是便隨口講了個４％的加幅。
「呢個世界都係大家俾面嘅啫。你敬我一呎，我敬你兩丈又點話！呢個數唔過份喇掛！」聽見魔術師咁講，包青天上司當然欣然接受。
正如前文《莫道你在選擇人，人亦能選擇你》所述，魔術師實在唔係太在意呢畢所謂「加人工」，畢竟隨時一個月收回的被動收入都多過一年的薪金升幅，呢個只係睇下米腸的誠意如何。
而當時，另外都有些同事係咁樣同包青天上司作面談的；而根據可以接觸到眾人薪金的俊男同事 Chi Lam 所言，小鮮肉同事Ｊ的加幅應該唔錯。
「照計包青天上司見你添咗丁，側側賻加多啲俾你。」Chi Lam 在跟魔術師、小鮮肉同事Ｊ、得力助手Ｌ午飯飲茶時對Ｊ說。
呢個午飯飲茶就係魔術師臨放假前一日，call 埋班友好一齊吃一餐，話「唔續約的話就係魔術師 last day 了」。
畢竟雖然話包青天上司同埋佢阿頭都 approve 咗，都仲要等米腸 Project Director approve，而愈遲愈無聲氣，其實就係唔得居多。
果然，昨日小鮮肉Ｊ傳來消息：

魔術師心知，年內俾米國部門點了好幾次，亦都有試過俾 user 因為米國的 bug 而令包青天上司個 team 都被責罵。根本上就係班米腸米婆亂咁嚟，成日 assume 米國 work 我城都 work，結果好幾次都俾魔術師捉住證據話佢地錯；最近有次仲係因為年中時想搶魔術師做佢手下的米婆唔睇 email attachment 就鬼殺咁嘈，俾魔術師串佢話「我特意將董事會通過給亞太區總舵主的授權信夾埋落去 email 裡面，你可能太忙，無 drill into details 去睇嘞！」
即時激到班米帝七孔生煙，鬧鬼魔術師唔 To 某位米帝，仲跌落地揦返渣沙話「董事會封信唔啱格式」（果然最叻就係搵啲雞毛蒜皮小事來岔開話題）。
包青天上司跟魔術師相視而嘻，解釋完一輪不果，包青天上司便闊佬懶理，放假去也。亞太區總舵主個授權無 enable 到，便由米婆向董事局解釋吧。
至於魔術師到現時還未收到續約書，亦都可能係同「對米帝態度唔好」有關。
不過，米腸呢招只能夠對工資奴起阻嚇作用。
魔術師就真係話之佢米爆，好似小鮮肉同事Ｊ咁，就算 approve 咗，一個仙都唔加，即係輸通脹，做僱傭兵做到咁折墮又真係為乜呢？
最後，就點返隻歌俾包青天上司、與及一眾僱傭兵同事聽先！
（亮點：尾段小提琴 solo 的靚女。）

＊＊＊
伸延閱讀：
莫道你在選擇人，人亦能選擇你
再回頭已是沒法追