2018年12月4日 星期二

俠之小者

上星期六,晚飯想玩單人打邊邊,但係由屯門市中心掃到去華都美心,所有邊邊都沽清,唯有頹頹地咁在美心叫咗個燒味雙併套餐。
由於人多的關係,魔術師都要搭檯,四人方桌對面坐的是造型有點像已故藝人王天鐸的中年光頭男。光頭男正在吃煲仔飯。
華都呢間美心晚市是有送餐服務的,等了不久,便有阿姐送來了燒味雙拼套餐。
「唔該哂!」魔術師禮貌地回應
魔術師正欲起筷,這時有另一名負捧餐的阿姐走來,跟光頭男解釋:「先生,我幫你問過嘞。49元係啫喱、灼菜、同飲品三揀一,你叫咗飲品,其他兩樣就無架嘞!」
「唔係掛?你地咁即係呃人啫!我上次食,三樣都有齊架喎!49蚊咁貴,如果只係三揀一,我就唔會叫嘞!」光頭男大聲夾惡。


「咁我再幫你去問吓喇!」阿姐不欲跟光頭男糾纏,使個藉口便脫身走人。
「嘿!個煲仔飯又唔係特別好食,49蚊,得嗰幾粒臘腸,乾掙掙咁,又唔熱,49蚊仲同我話得杯嘢飲!」光頭男重重覆覆,講嚟講去都係貴、唔好食、同埋呃咗佢兩樣嘢。
「係囉!呢度啲嘢水準真係唔得。」隔離檯又有個男人搭訕。
這時剛才的阿姐走過。光頭男見之,便又喝住阿姐:「喂!頭先叫你問,你唔係無咗回事吓話!」
呢條光頭男真係坐係度唔郁,咬住枝牙簽,成個大爺咁大大聲呼呼喝喝。
阿姐無奈,走去問咗一陣,拎返光頭男本來張單回來,指住話:「張單係寫『啫喱/灼菜/飲品』,個斜號係『或』嘅意思...」
「或咩呀或,你地唔係捉字虱吓話!」光頭男繼續發惡。
「呢個係我地公司嘅政策...」中年阿姐竟然識打官腔。
「我明明前排先食過,係三樣嘢都有架喎!」光頭男繼續發爛渣。
「請問你係邊間美心食呢?」真心估唔到一個只係捧餐的阿姐,對答都有紋有路。
「就係呢度囉!」光頭男講大話露了餡,明明又話唔好食,仲返轉頭食返同一個餐?
「但係呢個餐只係出咗兩日咋口喎!」阿姐的回應幾乎叫魔術師笑出聲。
「你叫你經理嚟...」光頭男開始語塞,便顧左右而言他。
一個大男人,捉住個捧餐阿姐係度喋喋不休,敲竹槓只為兩碟小菜,魔術師實在看不過眼,便插嘴道:「阿姐講得啱,我幫佢。斜號是『或』的意思,英文即係O—R—OR,幾個選項之中揀一個。好似我呢個燒味雙併咁,餐牌都係寫『叉燒/油雞/切雞/燒鴨』,飲品寫『奶茶/咖啡』,都係四揀二,二揀一,點會全部都有哂呢?」
光頭男即時被魔術師KO,只得口窒窒:「OR...我唔識OR咩?依家關你咩嘢事呀!」
「依家你坐係我對面,成日口噏噏,嘈住我食飯。你如果條氣唔順,咪去消費者委員會投訴美心呃人囉!」
阿姐拍一拍魔術師肩頭,示意唔好「去到咁盡」:「呢個我會同公司反映返...」
嘩!呢位捧餐阿姐,真係唔係一般阿毛,應該要升佢職!
「咁大間公司,用埋啲咁嘅招數嚟呃人。我會寫信俾你公司。」光頭男直至食完走人,依然喃喃自語,但係就連剛才附和着他的男人也無再出聲。魔術師只見光頭男出門口時仲好似特地走去餐牌的方向張望。
阿姐見光頭男一走,便走來執枱:「頭先真係唔好意思,麻煩到你添。其實40幾蚊,點會有咁多嘢食呀?」
「條友係度發窮惡啫!」為咗40幾蚊係度嘈,真係做「基層」都做得衰過人。
魔術師食完,出門時都特意走去餐牌嗰邊睇下,不過由於時間已經唔早,煲仔飯已被除牌。
唯有第二晚同樣再去睇過。
點知...

做乜無寫啫喱/灼菜/飲品嘅呢?不過,睇返其他小菜,「・」係「及」的意思,而「/」就係「或」咁解,有正常智慧的人都應該看得明白。
之不過,今次就有單人邊邊打,仲要係有藥膳湯底,有特多杞子,可以幫魔術師補下眼(見《自願私家醫保》),正呀!

***
伸延閱讀:
自願私家醫保

24 則留言:

  1. 阿姐見慣世面
    如果正面交鋒
    雖則道理在自已個面
    一但嘈交,對自己總是無益

    該要做到"西遊記"中
    沙和尚才是真正的高手
    https://www.youtube.com/watch?v=73SJFUmqR9k

    回覆刪除
    回覆
    1. //一但嘈交,對自己總是無益

      有無想過為什麼嘈交總是對自己無益呢?

      刪除
  2. 我上次去美心金雜扒,聞到的藥膳邊爐,真係好香!
    等我下次都試下先!

    呢D爛渣係要靠圍觀群眾先起到作用,駁送小恩小惠免去打爛招牌。
    所以你係咁e撐阿姐就破咗佢計劃,唔使去到咁盡。
    因為呢個世界咩人都有,萬一佢short起嚟成煲嘢哼落你到,又或者攞��刀��你兩野,咁你又要入廠㗎啦!
    製唔過。
    阿姐係果區可能見得多呢D無賴,駕輕就熟。

    回覆刪除
    回覆
    1. //等我下次都試下先!

      值得一試, 啲餸又多菜, 加半個烏冬, 剛剛好!

      刪除
  3. 姐姐都係打份工,一個大男人何必為難人...

    回覆刪除
    回覆
    1. 呢條光頭男直程係無賴喇, 影衰哂啲傷民.

      刪除
  4. 二和菜、三和菜、四和菜,以下任揀。唔通下面十幾二十味,全部包哂咩!

    回覆刪除
  5. //我明明前排先食過,係三樣嘢都有架喎!
    //但係呢個餐只係出咗兩日咋口喎!
    笑咗,呢啲賤人真係要大巴大巴摑。

    回覆刪除
  6. 我就撐光頭男嘞!因為『啫喱/灼菜/飲品』不是mutual exclusive。你食自助餐時會唔會淨食一樣?可能上次送錯咗俾佢。『叉燒/油雞/切雞/燒鴨』,『奶茶/咖啡』唔同,有mutual exclusive的意思。

    回覆刪除
    回覆
    1. //mutual exclusive

      是否 mutually exclusive 要看標點符號,不應加上主觀分類,否則難有共識。

      //你食自助餐時會唔會淨食一樣?

      不恰當類比。自助餐 by definition 係可以燒味任食,茶啡任飲的。

      刪除
  7. //做乜無寫啫喱/灼菜/飲品嘅呢

    分店經理從善如流,減兩蚊變單點

    //係囉!呢度啲嘢水準真係唔得
    『臭你又奶』

    //因為呢個世界咩人都有,萬一佢short起嚟成煲嘢哼落你到..
    幾碟小菜都R既cheap精,多數「君子」動口不動手啦....

    P.S.俾我係阿姐就叫廚房送個加料灼菜過佢

    回覆刪除
    回覆
    1. //幾碟小菜都R既cheap精,多數「君子」動口不動手啦...

      典型傷民.

      //P.S.俾我係阿姐就叫廚房送個加料灼菜過佢

      哈哈, 又係喎, 怕就怕「開咗先例」...

      刪除
  8. 斯善怕惡, 真係肉酸到呢! 有d人真係唔吊唔鬆化

    回覆刪除
  9. //你叫咗飲品,
    如果三樣都有就唔使點明要邊樣啦

    //mutually exclusive
    餐廳喺人地開嘅,喺老闆眼中就喺mutually exclusive,計過條數49文就喺得一樣。屋企自己煮先至可能mutually exclusive。做人要分莊閑。

    回覆刪除
  10. //mutually exclusive

    “本公司保留最終解釋權”

    //『臭你又奶』

    呢個應該係源自一個十零年前的我城都市傳說,事發地鐵車廂內一對男女鬧交,呢句對白係回應男既一句怒罵:

    “臭屄”

    //俾我係阿姐就叫廚房送個加料灼菜過佢

    食肆投訴一定係啲嘢上晒先發爛渣,這是常識吧.

    //依家你坐係我對面,成日口噏噏,嘈住我食飯。

    呢句回應“關你咩事”又幾絕。

    回覆刪除
    回覆
    1. //回應“關你咩事”//
      1. 當個個叫呢個餐,畀同一價錢時,都只得一個附送品,憑咩阿叔就可以有3個?
      唔公平交易當然影響任何一個幫襯嘅人。
      2. 佢講咩唔關我事,我講咩又使乜向佢交代。

      刪除
    2. //“臭屄”

      女友一句,全車靜晒

      //食肆投訴一定係啲嘢上晒先發爛渣,這是常識吧.

      所以光頭男應該話回水實際啲.

      //憑咩阿叔就可以有3個?

      所以美心根本唔會理佢.

      //佢講咩唔關我事,我講咩又使乜向佢交代。

      「關你咩事」係一句非常小學雞的說話.

      刪除
  11. 好耐好耐以前,記得在美心快餐(不是美心MX)晚市吃燒味雙併小菜晚餐,即是分開碟上燒味但貴十幾蚊果種,的確係有菜有茶有啫喱的

    但印像中燒味內容同質量與碟頭飯版本差別不大,碟菜又細又蒸到老晒,茶只係車仔茶包加滾水,啫喱超細pack兩啖食晒

    回覆刪除
  12. 我忽然覺得阿叔好侵侵,阿姐係加拿大⋯⋯

    回覆刪除