2018年8月10日 星期五

寧做低端人?

話說2018年第一個工作天,魔術師返到公司,發現自己個位已被另一人「佔領」:又電腦,又家庭相,又各項文件,統統都唔係自己的;而魔術師的水杯和藏有公司部手提電腦的 cabinet 則被移往另一邊。魔術師甚為不解,便 Whatsapp 包青天上司:

搞完一輪,終於明白了:原來部門秘書大媽A在2017年年底編排座位,魔術師本來係要搬走的,但大媽A卻沒有公告天下,卻告訴了從另一部門將在1月調過來的閏密大媽J知道,於是大媽J便在2017年年尾星期六將細軟全都搬過來,佔領了魔術師的座位,並將魔術師的個人用品掃到一角...
幾十歲人,唔好話連最基本的 business etiquette 都唔唔知,就連家教都無,擅自掃走他人物品,真係年紀活在狗身上。
唔好以為大媽J咁大膽眼都唔眨,字條都無張就掃走魔術師啲嘢,會係一個勇敢的人。相反,呢位大媽甚為鵪鶉,基本上只會跟「制度」做嘢;而呢啲所謂「制度」,其實只係佢一向做開嘢,行之有效的「習慣」,即使被其他同事投訴,又或魔術師好言提議更好方法,佢都少理:只要包青天上司無出聲,佢都只會依程序行事。
舉例說,大媽J以 Microsoft Outlook 出 mass email 通知一大群同事出席某些 training sessions,佢係會將個 mailing list 放在 To field 的;結果一有人 reply all 話出席與否,就成村人都收到哂,電郵信箱飽受轟炸,直至另一部門阿頭出 email 叫大家只需 click invite 為止。
又,例如有「新系統應用入門班」要舉行,一星期有五堂,同事只需報名參加其中一堂便可以,其實係可以用一個 email 將五個入門班的 meeting 全部打包寄出,收件人只需 click 其中一個 ICS 便可以將個 meeting invite 匯入到 calendar。魔術師曾提出呢個較好的方法俾大媽J參考,但佢都只會依然故我,逐個 invite 寄出,所以同事就會收到 traning session 1, training session 2, ..., training session 5 的 meeting invites,然後又會收到句話「你只需在五個 sessions 中選取一個」...
結果,又俾第二啲部門阿頭鬧,警告大媽J唔好成日轟炸人地個郵箱。當然,只要人地無向包青天上司投訴,大媽J都會依然故我,依「程序」做嘢。
直到最近,包青天上司見魔術師工作繁忙,但又需要落 order 叫電車部做嘢,於是便叫魔術師教大媽J點樣用電車部的 online system 落 order。魔術師講完之後,大媽J竟然問:「魔術師你可唔可以 draft 份稿俾我,我怕啲電車仔睇唔明我個 order。」
吓!?呢個 order 已經係簡單到無得再簡單,只係某些同事的 staff ID set 錯咗,叫電車仔改返啱而已;咁都要 template?如果魔術師寫埋俾佢,咁同自己做有乜分別?
魔術師同其他同事傾起呢件事,有同事話:「佢係驚俾人,尤其是係你,話佢做錯嘢啫!」
諗返轉頭,多年來魔術師都有跟被戲稱「廠仔」的 offshore 同事打交道,教親佢地做嘢,都發現佢地係咁機械人無分別的,一定要有 well defined 的 procedures,無指令就唔識做,更唔好諗住佢地會用腦去解決問題。「程序」就係佢地嘅擋箭牌:要找藉口,總可以在既定程序中找個漏洞出來的,「我地有跟住程序做,做完都錯」。
由於魔術師一向壇長的是解決問題,救火 fire-fight,基本套路只屬起手式,基餘都係靠觀察、思考、improvise、educated guess,要寫 step-by-step guidelines 俾班廠仔去跟係一件好辛苦的事。
係,公司用 offshore 係用來節省成本,預咗佢地係「低端人口」;之但係大媽J明明身在「貴價地區」,點解都會將自己當成係「低端人口」,無 guideline 無 template 就唔識做呢?
***
伸延閱讀:
Multiple meeting invitations in a single Outlook message - is this possible?

29 則留言:

  1. 公司文化,一直存在大量人做人係貴價地區,無得救。

    回覆刪除
  2. 部門秘書唔好得罪,有好多admin嘢靠佢地:-S

    回覆刪除
  3. //擅自掃走他人物品//
    畀我就嚇下佢話唔見咗幾千蚊! XD XD

    呢D大媽 J 最怕就係將來機械人取代佢哋,被淘汰又老奉要 productive 嘅人養。
    咁中意慣性唔好加人工吖笨!

    回覆刪除
    回覆
    1. //畀我就嚇下佢話唔見咗幾千蚊! XD XD

      「證據呢?」

      //呢D大媽 J 最怕就係將來機械人取代佢哋,被淘汰又老奉要 productive 嘅人養。

      一矢中的.

      //咁中意慣性唔好加人工吖笨

      J隨時只係只求唔好被裁員, 加唔加人工無所謂.

      刪除
  4. 呢種死跟guideline嘅人啱哂入政府做,唔知點解係私人機構都見到。

    回覆刪除
    回覆
    1. //唔知點解係私人機構都見到

      老油條通常都識玩呢類 guideline 遊戲.

      刪除
  5. 其實香港地冗員過多, 有30%人手係不必
    唔好講咩做做做OT 到PK, 基本上好多都係為做而做的制度野

    回覆刪除
    回覆
    1. 所謂做做做OT到PK其實都有好多不同模式
      有些老闆, 只要見有人準時走, 就會潛意式覺得俾左半斤糧攞唔足八兩
      於是就會紅眼症發作, 係咁加野比果個人做, 做到佢唔敢準時走為止
      如是者, 人人都日頭返工吹水過日神, 放左工先開始做野, 仲要慢慢做, 直至見倒老闆收工, 先拿拿淋草草收檔
      唔止效率低, quality都低到一個極點, 因同事日間忙於扮工, 電話無人聽, email 無人覆
      真係做倒野既人, 會不屑呢種垃圾扮工文化走人

      劣幣驅逐良幣, 直至有日, 腦細發現佢成間公司都係低端人, 或抱怨年青人唔肯捱, 或抱怨香港無人材, 總之問題係人地, 永遠都唔係自己問題
      佢可能永遠唔知道, 打工仔心人面一樣有個算盤, 肯收最低工資以下時薪陪你日日狂OT既人, 一定係自知市場價值有限既低端人口, 肯大減價賣比你既貨, 點會係絕世筍盤仲要送埋上門?

      刪除
    2. //香港地冗員過多, 有30%人手係不必

      再減20% project manager, 隨時係50%冗員

      //人人都日頭返工吹水過日神, 放左工先開始做野, 仲要慢慢做, 直至見倒老闆收工, 先拿拿淋草草收檔
      //真係做倒野既人, 會不屑呢種垃圾扮工文化走人

      又未必, 我反而喜歡用「輕鬆時間」做自己嘢 XD

      // 腦細發現佢成間公司都係低端人, 或抱怨年青人唔肯捱, 或抱怨香港無人材, 總之問題係人地, 永遠都唔係自己問題

      呢個就真. 一袋年青人又見到啲冗員都唔會受懲罰, 於是又唔服氣, hea 做...只會變成惡性循環.

      刪除
  6. 改變任何一個人都係好困難的
    山不轉路轉, 路不轉人轉, 所以我都習慣自己轉到搞得掂而又唔洗同人衝突算了
    唔係個個上司都好似包青天咁好人, 有啲你煩得佢多, 佢會專登向搞到你仲煩既方向出手...

    回覆刪除
    回覆
    1. //我都習慣自己轉到搞得掂而又唔洗同人衝突算了

      你已開始變成老油條了.

      //唔係個個上司都好似包青天咁好人

      包大人都幾好人架.

      刪除
  7. 只懂跟程序做,就是可以被程序 Replace。

    回覆刪除
    回覆
    1. 咁又未必, 程序可以十分煩複, 無十年八載都未必懂得熟練應用. 如是飛機師, 或是核电廠的操作員, 或是做大手術的医護人員自作主張叻唔切, 唔跟足程序做就大鑊鳥! 做得好其他人未必識欣賞你, 可能覺得你好運未賴嘢啫, 但有乜頭暈身熱, 冬瓜豆腐, 分分鐘要你寫報告解釋, 寫到你暈呀! 解釋唔到仲大鑊, 小則炒魷, 大則告到你褲甩, 知冇!

      老波骨

      刪除
    2. //只懂跟程序做,就是可以被程序 Replace。

      手板眼見的功夫都要跟程序, 就真係會被自動化取代了.

      //程序可以十分煩複, 無十年八載都未必懂得熟練應

      呢啲已經算係高階程序了, 要對事情有一定的理解才能夠運用自如.

      刪除
  8. 「只要包青天上司無出聲,佢都只會依程序行事。」
    是否以前曾犯錯? 一朝被蛇咬,十年怕草繩。

    回覆刪除
    回覆
    1. //是否以前曾犯錯? 一朝被蛇咬,十年怕草繩。

      有邊個未錯過? 之前我都同啲衰上司嘈過喇! 識貨嘅自然會識貨.

      刪除
  9. 其實不只政府及國企,香港地好多大公司都養住好多高人工的布偶。不過講真香港已經算有效率了,其他地方返工等放工的望窗族仲多呢!

    回覆刪除
    回覆
    1. 以前我會揾過另一份,但去到甘上下年紀,原來都會慢慢同化

      刪除
    2. //其他地方返工等放工的望窗族仲多呢!

      咁就已經係精神上「財務自由」了!

      //去到甘上下年紀,原來都會慢慢同化

      人在制度中只係一粒小鑼絲.

      刪除
  10. //魔術師同其他同事傾起呢件事,有同事話:「佢係驚俾人,尤其是係你,話佢做錯嘢啫!」
    大媽J:"有問題唔關我事我照魔兄咁做㗎咋"

    //基本上只會跟「制度」做嘢;而呢啲所謂「制度」,其實只係佢一向做開嘢,行之有效的「習慣」,
    好多老嘢將"自己習慣"同"制度"混為一談.

    回覆刪除
    回覆
    1. //有問題唔關我事我照魔兄咁做㗎咋

      D, 我好驚呀!

      //好多老嘢將"自己習慣"同"制度"混為一談.

      哈哈, 又係喎!

      刪除
  11. 上司叫包青天,好型。
    其實你講果D都係大公司通病,或多或少也會有,也避免不了,當份人工包埋。

    回覆刪除
    回覆
    1. //當份人工包埋

      我上次話俾包青天上司聽,已經寫定辭職信,洋腸M再屈我做嘢我就唔撈, 暗示咗其實我係賺錢買花戴的. 「當份人工包埋」呢類工資奴思想並不能夠用在我身上.

      刪除
  12. 程序嘅出現就係畀新手摸,畀蠢人跟,原本目的係避免做漏或跌落坑。
    程序都係人寫出嚟,唔係十戒咁呯呯兩舊石爆出嚟,唔係黐線佬幻想出嚟。
    一間大 I-bank merge 幾間 bank 後,程序又亂又冗長,時代又唔同嘞,係咪要 streamline 下佢先?
    邊個負責 streamline 個程序?哈哈!邊個最高人工邊個去囉!
    高人工又唔一定高智慧,可能空降聽聽話話,最大作用係幫最話事個插��霸地盤。呢啲咁嘅人做又36,唔做就38,邊有誘因做好份工?佢哋口中只有個 title,叨公司光,achievement? ... errr 識到最話事個囉!

    回覆刪除
    回覆
    1. //邊個負責 streamline 個程序?哈哈!邊個最高人工邊個去囉!

      愈高人工就愈離地, 但又愈鍾意手指指.

      //最大作用係幫最話事個插��霸地盤

      唔霸地盤霸人頸,就好容易話權力與人工不相稱, 隨時鳥絲不保!

      //佢哋口中只有個 title,叨公司光,achievement? ... errr 識到最話事個囉!

      正解呀!!!!

      刪除
  13. 我經常都不明白點解有d人咁蠢
    我有時會將極簡單的工作交給比較junior的同事,簡單講了有頭有尾點做
    但佢都會every step問一問,like 寫左一個date or word再問你岩唔岩
    當我知道自己做更快的時候,我慢慢就會自己做q晒
    我知道了解同事的性格,有些人是真的蠢,但有不少是扮蠢,等你做q晒佢

    回覆刪除
    回覆
    1. 呢件事我都遇得多,反正我多是單打獨鬥,唔使manage 手下, 於是便以poker face 對待, 等班低能同事去問其他人.

      再下一篇會寫.

      刪除